Норвегия – Қазақстан құрамалары арасындағы тартысты кездесу наурыздың 4-5-і күндері Ослодағы Oslo Tennisarena спорт кешенінде өтті. 2000 жылы бой көтерген жабық кешендегі теннис орталығы кейінгі жылдары жергілікті құрамаға сәттілік әкеп, осы орталықта бірқатар ойында жеңіске жеткен екен. Атап айтқанда, олар былтыр Барбадос (4:0), Өзбекстан (3:1) және Украина (3:1) теннисшілерін тізе бүктірген. Норвегиялықтар биыл да 2021 жылдағы жеңісті жолын жалғастыруға ниетті еді. Алайда Александр Бублик бастаған жігіттер әлемнің 8-ракеткасы саналатын Каспер Руудтың отандастарына еш мүмкіндік қалдырмады.
Іріктеу жарысының жеребесі бойынша, 4 наурыздағы алғашқы ойын күні бірінші болып кортқа Михаил Кукушкин мен Каспер Рууд, содан кейін Александр Бублик пен Виктор Дурасович шығатын болды. Екінші күнге жоспарланған үш кездесуде алдымен Александр Недовесов пен Андрей Голубев жұптық сында Каспер Рууд – Виктор Дурасовичпен, сосын Бублик пен Рууд, Кукушкин мен Дурасович кездесетін болып бекітілді.
Бірінші жарыс күнінің бәсекесінде кортқа бірінші болып әлемнің 160-ракеткасы Михаил Кукушкин мен ATP рейтингінде 8-орында тұрған Каспер Рууд шықты. Алғашқы сетте Каспер жерлесімізден еш қиындықсыз айласын асырды – 6:1. Екінші кезеңде Рууд жеңіске жету үшін біраз еңбектенуге тура келді. Өйткені М.Кукушкин ойын тізгінін өз қолына алып, допты ойынға қосу кезегінде үнемі есепте алға шығып отырды. Алтыншы геймге дейін таразы басы 3:3 болып теңесіп тұрған-ды. Бірақ жетінші геймде Рууд брейк жасап, есепте алға шықты. Норвегияның бірінші ракеткасы кейінгі геймде де білгенінен жаңылмай, бұл сетті де өз пайдасына жазды – 6:4. Осылайша, Каспер Рууд Норвегия құрамасына алғашқы жеңісін сыйлады.
Бірінші күннің екінші кездесуінде Александр Бублик пен Виктор Дурасович кім мықтыны анықтады. Бублик Қазақстанның бірінші, әлемнің 32-ракеткасы болса, қарсыласы дүниежүзілік рейтингте 321-орында тұр. Бірінші партияда бірден ойын тізгінін қолына алған қазақстандық теннисші екі геймнен брейкпен алға шықты – 2:0. Осы басымдықты бірінші партияның соңына дейін сақтай білген отандасымыз 6:3 есебімен жеңіске жетті. Екінші сетте есеп 2:2 болған кезде Бублик брейк жасап, алға шықты. Кейіннен тағы да бір брейкке қол жеткізді – 5:2. Ал кездесудің соңғы геймін эйспен аяқтады – 6:2. Бір сағаттан сәл астам уақытқа созылған бәсеке барысында Бублик 11 эйс жасап, 3 брейкке қол жеткізді. Сөйтіп Александр Қазақстан – Норвегия матчында таразы басын теңестіріп, жанкүйерлерге қуаныш сыйлады.
Осы кездесудегі бірінші сеттің екінші геймінде Ослодағы теннис аренасында электр жарығы өшіп, төреші кездесуді 10 минутқа тоқтатуға мәжбүр болды. Матчтан кейінгі баспасөз мәслихатында Александр Бублик электр қуатының өшуі ойынның басында болғандықтан, оның көңіл күйіне әсер етпегенін айтты. «Егер бұл тай-брейкте орын алса, бәлкім бұл екеуміздің бірімізге зиян тигізер еді. Сондықтан біз жағдайды салқынқанды қабылдауға тырысуымыз керек. Виктор жақсы ойнады, кей сәттерде аздап қобалжыды. Мен жақсы ойнадым, солай болуы керек еді. Сондықтан матчтың барысы негізінен анық болды», деді А.Бублик.
Ослодағы Норвегия – Қазақстан матчының екінші ойын күнін жұптық сында бақ сынайтын теннисшілер бастап берді. Бұл бәсекеде норвегиялықтар сапында Каспер Рууд пен Виктор Дурасович жұп құрап өнер көрсетуі керек еді. Алайда Норвегия құрамасының капитаны (бас жаттықтырушы) Андерс Хосет Руудқа демалыс беріп, 23 жастағы Симен Сунде Братхольмге сенім артты. Сөйтіп ол Виктор Дурасовичпен бірге қазақстандықтар Андрей Голубев пен Александр Недовесовке қарсы тұрды. Бірінші сетте норвегиялық жұп 4:1 есебімен алға шықты. Дегенмен қазақстандық теннисшілер соңғы сәтке дейін ойнап, 12 геймде таразы басын теңестірді. Сосын тай-брейкте 12:10 есебімен басым түсіп, жеңісті жұлып алды – 6:7. Екінші сетте қазақстандық жұп тағы бір брейк жасап, матчты жеңіспен тәмамдады – 6:3. Екі сағатқа жуық уақытқа созылған матчта қазақстандықтар 1 эйс жасап, 7 брейк-пойнттың екеуін пайдалана білді. Екінші күннің бірінші матчынан кейін Қазақстан құрамасы 2:1 есебімен алға шықты.
Төртінші кездесуде Қазақстан мен Норвегияның бірінші ракеткалары Александр Бублик пен Каспер Рууд шеберлік байқасты. Бұл кездесу жерлесіміз үшін өте ерекше матч болатын. Өйткені Бублик бұған дейін Руудпен кортта үш мәрте кездесіп, үшеуінде де жеңіліп қалған болатын. Сондықтан бұл матч Александрға Касперден есе қайтаруға және Қазақстан құрамасын мерзімінен бұрын турнирдің финалына шығаруға тамаша мүмкіндік еді. Қуанышқа қарай, кездесу Бублик жоспарлағандай өтіп, өткен үш жеңістің есесін қайтарды. Аса тартысты кездесудің бірінші партиясында брейк жасаған қазақстандық теннисші басымдық танытты – 6:4. Екінші сетте К.Рууд есе қайтарды – 7:5. Үшінші, шешуші партияны Бублик әуелі брейктің арқасында жеңіспен бастап (2:0), матч соңында 6:4 есебімен жеңіске жетті.
Осылайша, Қазақстан құрамасы қонақта Норвегия құрамасын 3:1 есебімен ұтып, биыл күзде өтетін Дэвис кубогының финалдық кезеңіне жолдама алды. Финалда Қазақстаннан бөлек, іріктеуде жеңіске жеткен Аустралия, Оңтүстік Корея, Нидерланд, Испания, Франция, Аргентина, Бельгия, Швеция, Италия, АҚШ және Германия құрамалары мен тікелей жолдамаға ие болған Хорватия, Ұлыбритания Сербия және былтырғы чемпион Ресей құрамасы ойнайды. Бірақ әзірге Ресейдің Испанияға бару-бармауы шешілген жоқ.
