Мазмұнды шара алдымен көрнекті ақынның шығармашылығы мен қайраткерлігіне арналған дөңгелек үстел мәжілісімен басталды. Онда сөз алған зиялы қауым өкілдері қаламгердің өмірі мен өнері туралы айта келіп, бүгінде шығармашылықпен айналысып жүрген әйелдер жайында да салмақты ой қозғады. Сондай-ақ қоғамдағы суретшілерді мазалаған өзекті мәселелер де айтылды.
Одан кейін іс-шара көрменің ашылуына ұласты. Мұнда Ұлттық музейдегі Өнертану бөлімінің жетекшісі Елдос Мертенов мерейтой иесінің шығармашылығына жан-жақты тоқталды.
− Мәриям Хәкімжанова поэзиясынан Отан, өмір, бейбітшілік туралы толғаған азаматтық үн айқын аңғарылып тұрады. Ол кісінің түрлі ауыртпалықты кешкен өмір жолын көпшілік біле бермейді. Сондықтан бүгінгі көрменің, әсіресе жастар үшін ой түйетін тәлімі мол» дей келіп, осы іс-шараны өткізуге мұрындық болған азаматтарға ризашылығын жеткізді.
Көрмеге 47 суретшінің 123 туындысы қойылды. Ол суретшілердің бәрі де жалпақ елге есімдері таныс, республикалық, халықаралық байқаулардың лауреаттары. Олардың барлығын әлемге көзқарастары мен көркем тілі, пішін мен композиция мәнері біріктіреді.
«Таң Шолпан» халықаралық тәуелсіз суретші әйелдер қорының президенті, Қазақстан Суретшілер одағының мүшесі Жәмилә Тәкен өз сөзінде аталған қор − суретші әйелдердің шығармашылық дамуына арналған алаң, онда әрбір суретші өзінің бірегей көркемдік стилі мен композициялық идеясын көрсетеді дейді.
