Жітіқарадағы «Комаров тау-кен кәсіпорнында» осыдан бір жыл бұрын жасақталған әйелдер бригадасының құрамында 91 тоннаға дейін жүк көтеретін Komatsu-785 көлігін жүргізетін Әсел Тұяқова, Надежда Чупахина, Ажар Жақсыбаева, Әлия Есенова сынды арулар шахтаның терең қойнауында қопарылған жыныс қыртыстарын жер үстіне шығарады. Кенші әйелдер екі-екіден, ауысым бойынша бөлініп жұмыс істейді. Әсел мен Ажар таңертеңнен кешке дейін рульде, ал түнге қарай оларды Әлия мен Надежда ауыстырады.
Тұрқына қарасаң, оңайлықпен қозғала қоймайтындай болып көрінетін алып машинаның тілін әйелдердің қай-қайсысы да жетік меңгеріп алған. Төрт ару бұған дейін де көлік жүргізген. Надежданың рульге отырғанына биыл жиырма жылдан асыпты. Ал Ажардың 18 жыл жүргізушілік өтілі бар.
Қалай десек те, кеніш көлігін жүргізу аса жауапты әрі ауыр жұмыс.
– Сіздерді мұндай жұмысқа үйдегі отағаларыңыз қалай жіберіп жүр?, деп едік, жүргізуші келіншектер: – Жолдастарымыз да осында жұмыс істейді, біз қайда барамыз?, деп күле жауап қатты. Әселдің жұбайы ғана бастапқыда зайыбының кеніште көлік жүргізуіне қарсы болыпты, алайда кейін жұмсарған көрінеді. Ал Надежданың жұбайы «Комаров» кәсіпорнында «Газель» көлігін жүргізеді. – Кейде екеуміз жол үстінде кездесіп қаламыз. Ондай сәттерде шап-шағын көлігі көзіме шырпының қорабындай болып көрінсе де, қорашсынбай жеке басын сыйлап, таудай мәшинемді шетке бұрып жұбайыма жол беремін, – деп қулана жымиып қойды Komatsu жүргізушісі.
Қостанай облысы
