«Бала барысы» облыстық турнирінің ашылу рәсімінде Балалар мен жасөспірімдердің ұлттық спорт мектебінің басшысы Айбат Қабажаев жас балуандарға сәттілік тілеп, өңірде қазақ күресін дамытуға үлес қосып жүрген спорт ардагерлеріне алғыс айтты.
Жас спортшыларды құттықтаған қалалық білім бөлімінің басшысы Гүлсім Оразбаева бүгінде мектеп қабырғасында білім алып жүрген жасөспірімдердің ұлттық спортқа, әсіресе қазақ күресіне деген қызығушылығы мол екенін атап өтіп, мұндай спорт жарыстарының өскелең ұрпақты тәрбиелеудегі өнеге-тағылымы айрықша екендігіне тоқталды.
– Жалпы, Қостанай жері көптеген ұлт қайраткерін дүниеге келтірген киелі мекен. Кешегі Алаш арыстары осы елдің жарқын болашағы үшін, бүгінгі жастар үшін қызмет етті. Спорт пен білім егіз. Осы қағиданы жадына түйіп өскен жас жақсы азамат болып қалыптасады. Биыл Мемлекет басшысы Қасым-Жомарт Тоқаев 2022 жылды Балалар жылы деп жариялағанын білесіздер. Президент балалардың құқықтарын қорғап, дарынды балаларды қолдау керектігін ерекше атап өткен болатын. Өнегелі білім, үлгілі тәрбие алу сіздердің басты міндеттеріңіз. Биыл, міне «Рухани жаңғыру» бағдарламасына да бес жыл толады. Ұлттық спортымызды насихаттау осы рухани жаңғырудан басталады. Бүгін боз кілемге шығып бағын сынайтын жас балуандардың бәріне сәттілік серік болсын! – деді білім бөлімінің басшысы.
«Бала барысынан» үміткер өрендердің қай-қайсысы да осал емес. Бұған дейін аудандық, облыстық турнирлерде ысылып, үздіктер қатарынан көрініп жүрген кіл мықтылар. Жарыс қорытындысы бойынша жүлделі орынның бәрін Қостанай ауданының жас балуандары ұтып алды. III орынды Дәулет Мұхабетқали еншілесе, II орын Нұржан Аманбаевқа бұйырды. Ал қарсылас шақ келтірмеген Ерлан Айдос Қостанай облысының «Бала барысы» атағын жеңіп алды.
– Төрт жыл қатарынан тынбай жаттығып келеді. Шәкіртімнің болашағынан зор үміт күтемін. Алда Шымкентте өтетін республикалық чемпионатқа жолдама алды, сонда бағын сынайтын болады, – дейді Айдостың бапкері С.Дәрменбаев.
ҚОСТАНАЙ
