Атымтай мен Құралай бүгінде Ахмет, Әлихан есімді екі ұл, сегіз қыз тәрбиелеп отыр. Көпбалалы отбасының тұрмыс жағдайымен танысқан қала әкімі батыр анаға бесік арба сыйлап, балаларға базарлық-тәттілерден үлестірді.
– Оспановтар отбасының ауданы 58 шаршы метрдей пәтері бар. Әрине, бұл он балаға тарлық етеді. Алайда тар үйді мемлекеттік тұрғын үй қоры есебінен кеңейтуге заң мұрсат бермейді. Бірақ заңға қайшы келеді деп қол қусырып отыра беруге тағы да болмайды. Сондықтан мәселені шешу үшін демеушілердің көмегіне жүгінуге тура келді, – деді Марат Жүндібаев.
«Болашақ констракшн» құрылыс компаниясының құрылтайшысы Уәлихан Нысанов Оспановтар отбасының пәтерін жаңа салынып жатқан элиталық тұрғын үй кешеніндегі кең пәтерге айырбастап беремін деп отыр.
– Негізі бұл отбасының жағдайы жаман емес, ашық, еңбекқор, жақсы кісілер екен. Олар туралы әлеуметтік желіден оқығанмын. Содан жақында жұмыс барысымен қала әкіміне кіргенімде ол кісі осындай көпбалалы отбасы бар, егер қол ұшын беріп, қолдау көрсетемін деген ниетіңіз болса, хабарласарсыз деді. Кеңсеге келген соң мамандармен кеңесіп көрсем, көмектесуге мүмкіндік бар екен. Бірден оң шешім қабылдап, әкім екеуміз барып, қуантып қайттық. Мені қуантқаны, біз салып жатқан үй сол маңайда, балалардың қазір оқып жатқан мектебіне жақын. Біз барғанда үйге адам толып кетті, үй иелері дастарқан жайып, төрге шақырған соң, астан аттап кетуге ыңғайсызданып, үстел басына отырып едік, қуаныш үстінде байқамай ыстық шай ішіп қойып, оразамды бұзып алдым. Енді Алла кешірсін, бұйырса кейін өтеп алармын, – деп күлді Уәлихан Нысанов.
Қасиетті Рамазан айында жасалған ізгі амал, шарапатты істің сауабы мың есе мол. Шаңырағы кеңейіп, көңілі өскен көпбалалы әке Атымтай да атымтай демеушілерге ағынан жарылып алғыс айтты.
– Мемлекеттен алақан жайып сұрамасақ та, өздері біліп қолдау көрсетіп жатқан облыс, қала басшыларына, құрылыс компаниясының басшысы Уәлихан Нысановқа, тілекші болған көпшілікке отбасымның атынан рахметімді айтамын! Қасиетті Рамазан айында жасаған жақсылықтары Алладан қайтсын деп тілеймін, – деді Атымтай Оспанов.
Жаңа салынып жатқан тұрғын үй кешені биыл тамыз айында пайдалануға беріледі.
ҚОСТАНАЙ
