Іс-шара барысында облыстық сыбайлас жемқорлыққа қарсы іс-қимыл департаментінің басшысы Серікжан Мырзалы қала тұрғындарын қабылдады.
«Antikor оrtalyǵy бұған дейін өз қызметін онлайн-форматта жүзеге асырып келді. Өңірде эпидахуалдың тұрақтануына байланысты бүгіннен бастап азаматтарды тікелей қабылдайтын боламыз. Сервистік орталықта Сыбайлас жемқорлыққа қарсы қызмет мамандары, заңгерлер мен қоғамдық ұйымдардың өкілдері жұмыс істейтін болады. Енді мемлекеттік органдар тарапынан қысым көрген кәсіпкерлер мен құқықтық көмек керек қарапайым қала тұрғындары осы орталыққа келіп жүгіне алады», деді департамент басшысы.
Орталыққа келген азаматтарға кеңес беріп, олардың шағымдарын қарастыратын, мәселелерінің шешілу жолдарын іздестіретін іс жүргізу офицері дейтін мамандар жұмыс істейді. Antikor оrtalyǵy алдағы уақытта мақсатты топтарға арналған түсіндіру және білім беру іс-шараларын ұйымдастырып, үкіметтік емес мекемелердің қызметкерлеріне арналған тренингтер, мемлекеттік органдардың еңбек ұжымдарымен кездесулер өткізуді жоспарлап отыр.
«Бүгін сіздер сервистік орталық жұмысының қаншалықты ашық екеніне көз жеткізетін боласыздар. Мұнда барлық азамат үшін мейлінше қолайлы жағдай жасалған. Жалпы, «Антикор орталығы» жемқорлықты жазалаудан гөрі, қауіпті қоғамдық індеттің алдын алу мәселелеріне көбірек көңіл аударатын болады», деді департаменттің ардагерлер кеңесінің өкілі Амантай Есімов.
Қостанай облысы
