Қансорғыш жәндіктер энцефалит, боррелиоз тәрізді жұқпалы аурулар таратады. Әзірге кене шағып емдеу мекемелеріне жүгінгендерден ондай қауіпті дерт анықталған жоқ.
– Кене шаққан алты адамның бәрі дәрігерлердің бақылауына алынды. Олардың денсаулығы үш апта бойы жіті қадағаланады. Сондай-ақ қазір ашық далада, егін алқаптарында, мал шаруашылығында еңбек етіп жүрген адамдарға екпе жасалады. Біз тұрғындарды аса сақ болуға шақырамыз. Кене шаққан адам дереу дәрігерге қаралмаса, асқынған ауру дауасыз дертке ұласуы мүмкін, – деді санитарлық-эпидемиологиялық бақылау департаментінің бөлім басшысы Людмила Налобина.
Қауіптің алдын алу мақсатында облыстық СЭБ департаменті мен Ұлттық сараптама орталығы филиалының мамандары Қостанай және Алтынсарин аудандарындағы елді мекендердің маңайынан кене жинап, жәндіктердің қандай дерттің қоздырғыштарын таратуы мүмкін екенін анықтамақ.
Қостанай облысы
