Төрт бүк, төрт шік, төрт алшы, төрт тәйке

Асық ату ойыны бойынша облыс мектеп оқушылары арасында  жарыс болып өтті

Облыс орталығындағы №25 жалпы білім беретін қазақ орта мектебінде асық ату ойыны бойынша өткен жарысқа облыс мектеп оқушылары жиналды. Алғаш рет ұйымдастырылған бұл шараға 10-18 жас аралығындағы жасөспірімдерден құралған, ауыл­­дардан келген 9 команда­ қатысты. Сөйтіп, Май, Лебя­жі, Павлодар, Баянауыл аудан­дарының, Екі­бас­тұз қаласы, облыс орта­лы­ғын­дағы мектеп командалары өзара сынға түсті. Әр команда құрамында 3 оқушыдан бар. Ұйым­дастырушылардың айту­ынша, асық ату ойыны спорт­тық турнирін өткізудегі мақсат, халқымыздың ұмытылып бара жатқан ұлттық салт-дәстүр ойындарын насихаттау. Асық ойыны – халқымыздың дәстүрлі ойыны саналады. Иіргенде түскен қалпына қарай асық: алшы, тәйке, бүк, шік деп, ал атуға арнап арнайы қорғасын құйылып жасалғаны – сақа, жақсылары – оңқай аталатынын ауылда өскендер біледі. Кішкене кезінде асық ойнамаған ауыл баласы жоқ шығар. Қазіргі күнгі елге танымал көптеген ағаларымыз да асық ойнап өсті. Ұйымдастырушылар жарысты асық ойынының түрлеріне сай: құмар, тәйке, омпы, алшы, хан, қақпақыл деп бөлді. Мысалы, құмар ойынға 2-4 оқушы қатысты. Ойын­шы­лар кезек-кезек төрт асықты иірді. Иіруші төрт бүк, төрт шік, төрт алшы, төрт тәйке түсір­ді де, жүлденің жартысын алды. Екін­шісінде, төрт асық төрт түр­лі түсті, яғни тігілген жүлдені түгел­­дей алды деген сөз. Омпы ойыны ой­налды. Ойын қызықты өтті. Жүгіресің, секіресің, терлей­сің, көздейсің, тигізесің, ерегі­сесің, жеңесің, жеңілесің, ұта­сың, ұтыласың. Міне, бұл – нағыз бәсеке. Ұлттық тәрбие. Ұлттық үлгі. Спорт­тық бәсеке ойыны: ше­бер­лікке, мергендікке, батыл­дық­қа тәрбиелейді. Жан-жақ­тан айғайлаған жанкүйерлер. Жарыс қорытындысы бойынша облыс орталығындағы «Назарбаев Зияткерлік мектебінің» командасы жеңіске жетті. Баянауылдық балалар екінші, екібастұздықтар үшінші орынды иеленді. Асық ату ойыны жарысында «Назарбаев Зияткерлік мектебі» командасының мүшелері Бекжан Пішкембаев, Рамазан Назкей, Қай­рат Мадияр жеңімпаз атанды. «Бәрінен бұрын асық ату жары­сында оқушылардың ұлттық ойы­ны­мызға деген құмарлықтары қуант­ты», дейді жаттықтырушы Қылыш Түсіпжанов. Фарида БЫҚАЙ, «Егемен Қазақстан». Павлодар облысы. Суретті түсірген Владимир БУГАЕВ.