Әлем • 22 Сәуір, 2022

«Орталық Азия+Жапония» диалогы

Қазақстан Сыртқы істер министрінің орынбасары Әділ Тұрсынов Орталық Азия өңірі мемлекеттері мен Жапония арасындағы дипломатиялық қатынастардың орнағанына 30 жыл толуына орай бейнеконференция режімінде «Орталық Азия+Жапония» диалогының 8-ші министрлік кездесуіне қатысты.

Меруерт БҮРКІТБАЕВА

Өткен үш онжылдықта Орталық Азия елдері мен Жапония арасында барлық бағыт бойынша жемісті ынтымақтастық орнап, екіжақты және көпжақты форматтарда сындарлы диалог жолға қойылып, сауда-экономикалық және мәдени-гуманитарлық өзара іс-қимыл серпінді дамып келеді.

Ә.Тұрсынов өз сөзінде еліміздің кеңейтілген стратегиялық әріптестігі бойынша Жапониямен қарқынды дамып келе жатқан жан-жақты ынтымақтастықты жоғары бағалады. Қазақстан тарапы денсаулық сақтау, ауыл шаруашылығы, цифрландыру, қоршаған ортаны қорғау және өзге де салалардағы өзара іс-қимылды жандандыруды ұсынды.

Жоғары деңгейдегі онлайн-кездесуге қатысушылар халықаралық және өңірлік бірқатар өзекті мәселені жан-жақты талқылап, сауда-экономикалық және инвестициялық ынтымақтастық, денсаулық сақтау, экология, тұрақты даму және өңірлік қауіпсіздік салаларындағы өзара іс-қимылды кеңейту перспективаларын белгіледі.

Жапонияның бастамасымен өткен «Орталық Азия+Жапония» диалогының алғашқы кездесуі 2004 жылы Қазақстан астанасында өткен еді. Формат шеңберіндегі ынтымақтастықтың негізгі бағыттары – саяси диалог, өңірішілік ынтымақтастықты дамыту, бизнесті қолдау, зияткерлік диалог, мәдени байланыстар және адами капиталды нығайту. «ОА+Жапония» диалогының кезекті 9-шы министрлік кездесуін биыл жыл соңына дейін Токиода өткізу жоспарланып отыр.

Күннің маңызды және өзекті жаңалықтарын «Егемен Қазақстан» телеграм каналынан оқыңыз