ЕУРАЗИЯЛЫҚ ЭКОНОМИКАЛЫҚ ОДАҚ – ДАМУДЫҢ ЖАҢА МҮМКІНДІГІ
Алматыдағы Тұран университетінің мәжіліс залында «Еуразиялық интеграцияның өзекті мәселелері» атты тақырыпта дөңгелек үстел болып өтті. Онда еліміздің адамзатқа ортақ мәдени-экономикалық және ғылыми кеңістікке кірігу мәселесінде ең өзекті деген пікірлер ортаға салынды.
Дөңгелек үстел отырысына қатысқан экономист ғалымдар, саясаттанушылар мен қоғам қайраткерлері, саяси партиялар өкілдері мен қоғамдық ұйымдар, шағын және орта кәсіпкерлік одақтардың мүшелері еуразиялық интеграция кеңістігінде жүріп жатқан үдерісте аса маңызды мәдениет, экономика, ғылым-білім саласын қамтитын сараптамалық құжаттарды талқылап, салалық мәселені жүйелеген баяндамалар жасады.
Қазақстан Жоғары оқу орындары қауымдастығының төрағасы, Тұран университетінің ректоры Рахман Алшанов алқалы жиынды жүргізіп, бас қосқан ғалымдар мен қоғам қайраткерлеріне кезекпен сөз ұсынып отырды. Т.Рысқұлов атындағы Қазақ экономикалық университетінің ректоры Серік Святов, Алматы қаласы Кәсіпкерлер палатасының директоры Ерлан Стамбеков, Қазақстан Республикасы Ұлттық ғылым академиясының академигі, профессор Сағындық Сатыбалдин, Қазақстан Қаржыгерлер қауымдастығы басқармасының төрағасы Серік Аханов, Алматы локомотив пайдалану депосының директоры Болат Оспанов, әл-Фараби атындағы Қазақ ұлттық университетінің профессоры Шолпан Жаманбалаева, «Алматы ауыр машина жасау зауыты» АҚ-тың директоры Жетпісбай Едігенов экономикалық және мәдени интеграциялық үдерістер аясында отандық бизнес, мәдениет пен білім-ғылым өкілдері қандай талаптарды негізге алып, халықаралық бәсекелестік кеңістігінде кездесетін жағдайлар мен олардың шешімін пікірталас түрінде ортаға салды.
Халықаралық қатынастар, оның ішінде, мемлекеттердің өзара тығыз байланысы, әлемдік шаруашылықтың одан әрі жаһандану үрдісін және осымен байланысты елдер арасындағы әріптестікті нығайту мен мамандану үдерістерін реттеудегі объективті қажеттілігін, халықаралық бәсекелестіктің ушығуы мен соның нәтижесі ретінде біртұтас экономикалық және мәдени еуразиялық кеңістікті құру мен нығайтудың артып отырған қажеттілігін, заманауи әлеуметтік-мәдени дамудың динамикасын сараптау мен еуразиялық кеңістіктегі мәдени жемісті үнқатысу қалыптастыруда концептуалды шараларды әзірлеу маңызды болып табылатындығын ескеріп, Қазақстан бүгінгі заманға тән интеграциялық үдерістерден тыс қала алмайтындығы айтылды.
Бүгінгі күннің талаптары жаңа міндеттер қоятыны хақ. Өзара тиімді экономикалық кеңістікті құру міндетін шешуге бейімделген, еркіндік пен тең құқықтық қағидаларына құрылған мемлекетаралық жаңа бірлестіктің пайда болуы Қазақстан Республикасының ұзақ мерзімді мүдделеріне сай келетіндігін негізге ала отырып, дөңгелек үстел қонақтары қарар қабылдады.
Дөңгелек үстелге қатысушылар, табиғи ресурстарды, адами әлеуетті, қалыптасқан инфрақұрылымдарды, ғылыми-мәдени кеңістікті, маманданған өндірісті ескере отырып, тең құқықтық негізде құрылатын Еуразиялық Одақтың алдағы уақытта дамыған және бәсекеге қабілетті мемлекетаралық экономикалық бірлестіктердің бірі болатынына сенім білдірісті.
Қанат ЕСКЕНДІР,
«Егемен Қазақстан».
АЛМАТЫ.
Дерек пен дәйек
Алматыда «Тұран» университетінде өткен дөңгелек үстелге қатысушылардың келтірген мәліметтеріне қарағанда, 2013 жылы Алматы қаласының Кеден одағы елдерімен сыртқы тауар айналымы 8,6 миллиард долларды құраған. * * * Осыдан 20 жылдан астам уақыт бұрын Қазақстан Президентінің еуразиялық интеграция жөніндегі идеясы бүгінде табысты жүзеге асырылып жатыр. Кеден одағы, Бірыңғай экономикалық кеңістік құрылды. * * * Жиынға қатысушылардың айтуынша, Қазақстанның қаржы секторын дамыту үшін Ұлттық банк 2030 жылға дейінгі тұжырымдаманы әзірледі. * * * Дөңгелек үстел басындағы пікір алмасуда мемлекет бизнестің дамуына жағдай жасау қажеттігі, ал бизнес өкілдері оны дұрыс пайдаланумен айналысулары тиіс екендігі айтылды. * * * Қазақстандық кәсіпкерлер үшін Ресей рыногының кең көлемде ашылуы өнім өндіру көлемін шамамен 8 есеге арттыруға жол ашатыны жиын барысында атап өтілді. * * * Дөңгелек үстел кезінде шетелдік банктер адам дүниеге келіп, қартайғанға дейінгі аралықта 358 қаржылық қызмет түрін көрсететіндігі, ал қазақстандық банктердің көрсететін қызметі бұдан екі есе аз екендігі атап өтілді.
