18 Мамыр, 2010

ҚЫЗЫЛАҒАШТЫҚ ЖАСТАРДЫҢ ҚУАНЫШЫ

435 рет
көрсетілді
3 мин
оқу үшін
Біраздан бері көпшіліктің кө­ңілін алаңдатқан Қызылағаштағы тасқын салдарынан болған зар­дап­ты жою шаралары біртіндеп ар­насына түсіп келеді. Тұрғын­дардың алғашқы легі сәулетті үйлерге кіріп қуанса, қалғандары да құрылысы аяқталуға жақын бас­паналарын асыға күтуде. Тас­қыннан үлкендер ғана емес, жас ұрпақ та қиыншылыққа тап бол­ды. Өйткені, мұндағы мектеп ғи­мараты зардап шегіп,  оқушылар Талдықорған қаласы мен басқа да білім шаңырақтарында оқуларын жалғастыруларына тура келген-ді. Міне, оқу жылы да  аяқталуға жа­қын. Енді мектеп бітіруші түлек­терді алдағы бірыңғай ұлттық тес­тілеуге қатысты мәселелер ойлан­дыруда. Облысқа іссапармен келген Білім және ғылым министрі Жан­сейіт Түймебаев тасқыннан зардап шеккен ауылда болып, Қызыл­ағаш, Егінсу елді мекендеріндегі мек­теп бітіруші түлектермен кез­десті. Министр аталған елді ме­кен­дердегі түлектердің ҰБТ-ны бел­гіленген уақытта емес, бір жарым ай кейін, яғни шілденің 19-ы мен 26-сы аралығында тап­сыруға мүмкіндік жасалғандығын жет­кіз­ді. Сынақ барысында оқуға қа­был­дануға тиіс ең төменгі 50 бал­лға қол жеткізген шәкірттер кон­курсқа түскенде жеңілдік жа­са­ла­тын болды. Аталған ауыл­дар­дағы жоғары оқу орнының ақылы бөлімінде оқитындарға екінші жар­тыжылдықтың ақысын төле­мейтіндігі және жатақханаларда тегін тұру мүмкіндігі жасалатыны да айрықша қамқорлық деуге болады. Кездесуде мектеп бітіретін тү­лек­тер сөйлеп, Мемлекет бас­шы­сы мен  Білім және ғылым минис­трі­не, облыс әкіміне өздеріне жа­салған қамқорлықтары үшін ал­ғыстарын айтты. Өздерінің бір­ың­ғай ұлттық тестілеуді уақытында тапсыруға мүмкіндіктері бар екен­діктерін, қиыншылыққа қарамас­тан мектеп бағдарламасынан қалмай, өз уақтысында жан-жақты білім алуға мүмкіндік жасалғанын айтты. Жүздесуде облыс әкімі Серік Үмбетов облыстық мәслихаттың сессиясына биылғы түлектерді облыс әкімінің грантымен оқыту жөнінде мәселе қойылатындығын айтып, баршаны қуантып тастады. Қазіргі кезде облыста 273 әлеу­мет­тік жағынан жеткіліксіз қамтылған отбасыларының балалары осын­дай жеңілдікке ие. Енді оның қатары өсе түспек. Демек, түлектер қамқорлықты сезініп, өмірден өз орнын табуларына ынталанса, нұр үстіне нұр деген тілек қосты жиналғандар. Түлектердің жүрегіне от жандырған жүздесуде министр бір топ мектеп басшылары мен ұстаздарды марапаттады. Олардың арасында І. Жансүгіров атындағы мектеп директоры Ә.Байтұмақов, ұстаз Р.Иманқұлова Ыбырай Алтынсарин атындағы төсбелгі­мен, мұғалім Т.Бектемірова, Ақто­ған ауылындағы мектептің дирек­торы Т.Асылбаев, Егінсу ауылы­ның ұстазы Ж.Ахметова мен қызылағаштық Б.Қыдыкенова Білім және ғылым министрлігінің Құрмет грамоталарына ие болып, мерейленді. Күмісжан БАЙЖАН, Алматы облысы.