Парламент Мәжілісі Төрағасының орынбасары Дариға Назарбаева бастаған Парламент Сенаты мен Мәжілісінің бір топ депутаттары Солтүстік Қазақстан облысында екі күндік жұмыс сапарымен болып, өңірдің әлеуметтік-экономикалық даму барысымен танысты.
Халық қалаулылары алдымен облыстық балалар ауруханасына атбасын тіреді. Медициналық мекеменің бас дәрігері Олег Завьялов мәртебелі меймандарды атқарылып жатқан шаралармен таныстырды. Мұнда 1986 жылдан мүгедек балаларды оңалту бөлімшесі жұмыс істейді. Былтыр екі мыңға жуық балдырған осында ем-дом алып, сауығып шыққан. Күндізгі стационар ашылып, ауру белгілерін ерте анықтаудың арқасында кеселді асқындырмай емдеудің жолға қойылғаны байқалады. Вице-спикердің мүгедек балаларды сауықтыру қандай дәрежеде деген сауалына 97 пайыз деп жауап берілді. Туабітті мүгедектікке ұшыраған сәбилер перинаталдық орталықтан жеткізілісімен арнайы жабдықталған төрт залда ем-дом алып, 15 жасқа дейін дәрігерлердің қатаң бақылауында болады.
Сенат және Мәжіліс депутаттары сенсорлық, тұзды шахта, денешынықтыру бөлмелерін, массаж, инемен емдеу кабинеттерін аралап көріп, материалдық-техникалық базаның жақсы жабдықталғанына көздерін жеткізді. Аймақ басшысы Самат Ескендіров аурухананы қаржыландыруға биыл 840 миллион теңге қарастырылғанын, ақша былтырғы жылға қарағанда 1,5 есе көп бөлінгенін жеткізді. Үстіміздегі жылы осы заманғы төрт медициналық құрал-жабдық сатып алынған. Сұрақ-жауап түріндегі пікір алысу барысында аурухана жұмысының сапалық көрсеткіштерін айғақтайтын басқа да деректер келтірілді.
Оңалту бөлімшесінің меңгерушісі Ирина Тищенко «Саламатты Қазақстан» бағдарламасы шеңберінде жүзеге асырылған жұмыстарды ортаға салды. Балалар арасында жүйке, туабітті аурулар, психикалық ауытқушылық кең таралып отыр. Дариға Нұрсұлтанқызы өз сөзінде «Қазақстан-2050» Стратегиясында мүмкіндігі шектеулі адамдарды қоғамдық өмірге, белсенді еңбекке тартудың жолдары жан-жақты қарастырылғанын айта келіп, жас аналар күтіміне, скринингтік тексерістердің жүйелі жүргізілуіне, диагностикалық зерттеулердің дәлдігіне, диагноздың нақты қойылуына өзгелердің назарын аударды.
Бұдан кейін халық қалаулылары есту қабілеті нашар балаларға арналған облыстық арнайы мектеп-интернатқа келіп, мекеменің директоры Жанкелді Тәжиннің хабарламасын үлкен ыждағатпен тыңдады. 120 орынға шақталған интернатта есту қабілеті туабітті болмаса жүре келе зақымданған 151 тәрбиеленуші білім алады. Олардың 14-іне кохлеарлық имплантациялық ота жасалған. 2009-2013 жылдар аралығында 32 түлек жоғары, арнаулы оқу орындарына түссе, 18-і тұрақты жұмысқа орналасқан. Қолданылған нақты шараларға қарамастан, есту кемістігі бар балалардың жыл өткен сайын көбейіп келе жатқаны алаңдатпай қоймайды. Облыстық балалар ауруханасы жанындағы сурдологиялық кабинетте 244 бала есепте тұр. 4500 нәрестенің 12-15-сі туабітті құлақ мүкісімен ауырады. Осында Түмен облысына қарасты Щадринск арнайы мектеп-интернатпен on-line конференциясы ұйымдастырылып, көптен бері ынтымақтаса жұмыс жасап келе жатқан мекемелер өзара тәжірибе алмасты. Шекаралас өңірде құлақ қондырғыларын ауыстыру, жөндеу, жаңалау ісі мемлекет тарапынан оң шешім тапқан. Халық қалаулыларының тағы бір аялдаған жері балалардың психоневрологиялық интернат үйі болды. Мекеме директоры Аягөз Ермағамбетовтің айтуынша, әлеуметтік оңалтудың жаңа стандарттары сегіз бағыт бойынша атқарылады. 3-18 жас аралығындағы 106 тәрбиеленушінің биылғы күтіміне 224 миллион теңге бөлінген. Протез-ортопедиялық орталығының Петропавл қаласындағы филиал жұмысы да қонақтардың ризашылығын тудырды. Өз өнімдерін Қостанай, Ақмола, Қарағанды облыстарына, Астана қаласына жөнелтумен айналысатын кәсіпорында 82 адам жұмысқа тартылған. Орташа айлық жалақы 98 мың теңгені құрайды.
Қызылжар ауданында депутаттар жұртшылықпен жүздесіп, жергілікті мәселелер бойынша өз ойларымен бөлісті.
Халық қалаулыларының Қызылжар өңіріне жұмыс сапары кеше одан әрі жалғасты. С.Мұқанов атындағы кітапханада Д.Назарбаеваның төрайымдық етуімен Әлеуметтік-экономикалық даму комитетінің көшпелі мәжілісі өтіп, 2012-2018 жылдарға арналған ұлттық іс-қимыл жоспары талқыланды. Онда мүгедек жандардың, балалардың құқығы мен өмір сапасын жақсартудың кешенді шаралары жөнінде ұтымды ұсыныстар айтылды.
Өмір ЕСҚАЛИ,
«Егемен Қазақстан».
Солтүстік Қазақстан облысы.
Халық қалаулылары алдымен облыстық балалар ауруханасына атбасын тіреді. Медициналық мекеменің бас дәрігері Олег Завьялов мәртебелі меймандарды атқарылып жатқан шаралармен таныстырды. Мұнда 1986 жылдан мүгедек балаларды оңалту бөлімшесі жұмыс істейді. Былтыр екі мыңға жуық балдырған осында ем-дом алып, сауығып шыққан. Күндізгі стационар ашылып, ауру белгілерін ерте анықтаудың арқасында кеселді асқындырмай емдеудің жолға қойылғаны байқалады. Вице-спикердің мүгедек балаларды сауықтыру қандай дәрежеде деген сауалына 97 пайыз деп жауап берілді. Туабітті мүгедектікке ұшыраған сәбилер перинаталдық орталықтан жеткізілісімен арнайы жабдықталған төрт залда ем-дом алып, 15 жасқа дейін дәрігерлердің қатаң бақылауында болады.
Сенат және Мәжіліс депутаттары сенсорлық, тұзды шахта, денешынықтыру бөлмелерін, массаж, инемен емдеу кабинеттерін аралап көріп, материалдық-техникалық базаның жақсы жабдықталғанына көздерін жеткізді. Аймақ басшысы Самат Ескендіров аурухананы қаржыландыруға биыл 840 миллион теңге қарастырылғанын, ақша былтырғы жылға қарағанда 1,5 есе көп бөлінгенін жеткізді. Үстіміздегі жылы осы заманғы төрт медициналық құрал-жабдық сатып алынған. Сұрақ-жауап түріндегі пікір алысу барысында аурухана жұмысының сапалық көрсеткіштерін айғақтайтын басқа да деректер келтірілді.
Оңалту бөлімшесінің меңгерушісі Ирина Тищенко «Саламатты Қазақстан» бағдарламасы шеңберінде жүзеге асырылған жұмыстарды ортаға салды. Балалар арасында жүйке, туабітті аурулар, психикалық ауытқушылық кең таралып отыр. Дариға Нұрсұлтанқызы өз сөзінде «Қазақстан-2050» Стратегиясында мүмкіндігі шектеулі адамдарды қоғамдық өмірге, белсенді еңбекке тартудың жолдары жан-жақты қарастырылғанын айта келіп, жас аналар күтіміне, скринингтік тексерістердің жүйелі жүргізілуіне, диагностикалық зерттеулердің дәлдігіне, диагноздың нақты қойылуына өзгелердің назарын аударды.
Бұдан кейін халық қалаулылары есту қабілеті нашар балаларға арналған облыстық арнайы мектеп-интернатқа келіп, мекеменің директоры Жанкелді Тәжиннің хабарламасын үлкен ыждағатпен тыңдады. 120 орынға шақталған интернатта есту қабілеті туабітті болмаса жүре келе зақымданған 151 тәрбиеленуші білім алады. Олардың 14-іне кохлеарлық имплантациялық ота жасалған. 2009-2013 жылдар аралығында 32 түлек жоғары, арнаулы оқу орындарына түссе, 18-і тұрақты жұмысқа орналасқан. Қолданылған нақты шараларға қарамастан, есту кемістігі бар балалардың жыл өткен сайын көбейіп келе жатқаны алаңдатпай қоймайды. Облыстық балалар ауруханасы жанындағы сурдологиялық кабинетте 244 бала есепте тұр. 4500 нәрестенің 12-15-сі туабітті құлақ мүкісімен ауырады. Осында Түмен облысына қарасты Щадринск арнайы мектеп-интернатпен on-line конференциясы ұйымдастырылып, көптен бері ынтымақтаса жұмыс жасап келе жатқан мекемелер өзара тәжірибе алмасты. Шекаралас өңірде құлақ қондырғыларын ауыстыру, жөндеу, жаңалау ісі мемлекет тарапынан оң шешім тапқан. Халық қалаулыларының тағы бір аялдаған жері балалардың психоневрологиялық интернат үйі болды. Мекеме директоры Аягөз Ермағамбетовтің айтуынша, әлеуметтік оңалтудың жаңа стандарттары сегіз бағыт бойынша атқарылады. 3-18 жас аралығындағы 106 тәрбиеленушінің биылғы күтіміне 224 миллион теңге бөлінген. Протез-ортопедиялық орталығының Петропавл қаласындағы филиал жұмысы да қонақтардың ризашылығын тудырды. Өз өнімдерін Қостанай, Ақмола, Қарағанды облыстарына, Астана қаласына жөнелтумен айналысатын кәсіпорында 82 адам жұмысқа тартылған. Орташа айлық жалақы 98 мың теңгені құрайды.
Қызылжар ауданында депутаттар жұртшылықпен жүздесіп, жергілікті мәселелер бойынша өз ойларымен бөлісті.
Халық қалаулыларының Қызылжар өңіріне жұмыс сапары кеше одан әрі жалғасты. С.Мұқанов атындағы кітапханада Д.Назарбаеваның төрайымдық етуімен Әлеуметтік-экономикалық даму комитетінің көшпелі мәжілісі өтіп, 2012-2018 жылдарға арналған ұлттық іс-қимыл жоспары талқыланды. Онда мүгедек жандардың, балалардың құқығы мен өмір сапасын жақсартудың кешенді шаралары жөнінде ұтымды ұсыныстар айтылды.
Өмір ЕСҚАЛИ,
«Егемен Қазақстан».
Солтүстік Қазақстан облысы.
