Өнер • 16 Мамыр, 2022

Сәулелі сапар суреттері

Әбілхан Қастеев атындағы Мемлекеттік өнер музейінде суретші Ботагөз Нұрпейісованың «Сұлулықтың бастауы» атты жеке көрмесі ашылды. Экспозицияда автордың 80-нен астам көркем және графикалық жұмыстары ұсынылған.

Арман ОКТЯБРЬ

Ботагөздің балалық шағы Павлодар облысы, Набережный ауылында өткен. Ертіс өзенінің жағасындағы әспеті бөлек әсем табиғат суретші кенебіндегі көркем образға айналған. Сюжеттер еңбекқор ауыл тұрғындарының өмір тынысы туралы баяндайды. Әсіресе әке мен ана портреттері махаббат пен мейірімге толы. Ауыл табиғатын жырлаған туындылардан жарқын болашаққа ұмтылған бақытты балалық шақ туралы ностальгиялық ноталар естіледі.

Ботагөз қылқаламындағы тағы бір ерекшелік – түрлі халықтардың мәдениетінен адамзатқа ортақ құндылық іздеу. Өмір арнасы, тұрмыс-тіршілігі, тіпті наным-сенімі бір-бірімен мүлде қабыспайтын ұлттардың өнерінен ұқсастық таба отырып, оларды рухани тұтастыққа шақыру суретшінің қайраткерлік қыры деп атауға болады. Үнді тақырыбына арналған жұмыстар сериясы автордың терең фило-
софиялық дүниетанымынан хабар береді.

Бұл туралы көрме жетекшісі, өнертанушы Наталия Баженова: «Үндістан Ботагөздің жүрегіне бала кезден жақын. Әйгілі «Огонек» журналының беттерінен көрнекті суретші, философ және саяхатшы Николай Рерихтің суретін көрген кезде оның бала арманы бүр жарған. Содан кейін суретші болу арманы орындалды әрі ондаған жыл өткен соң осы көрмеде ұсынылған таулардың керім-келбеті, ұлы шебердің портреті пайда болды», деп атап өтті.

– Үндістанның қасиетті жерлеріне саяхат 2011 жылы басталып, алып Гималай бөктерінде өткен шығармашылық күндер жемісті болды. Куллу алқабында, Наггарда (Химачал Прадеш штаты) өмірден алынған этюдтер жазылды. Дәл осы жерде атақты Орталық Азия экспедициясынан кейін Н.К.Рерих және оның отбасы «Урусвати» – Гималай зерттеулер институты құрылды. 2019 жылы Үндістанның солтүстік-шығысындағы штаты Сиккимге сапар шектік. 2020 жылы осы бір сәулелі сапардан алған әсердің арқасында көптеген жаңа графикалық және көркем туындылар жасап шықтым, – дейді Ботагөз Нұрпейісова.

Экспозицияда ұсынылған туындылардың бір парасы Қазақстандағы «Бхаратанатьям» алғашқы және жалғыз Үнді классикалық биінің кәсіби орын-
даушысы Қазақстанның Еңбек сіңірген өнер қайраткері – Ақмарал Қайназарованың шығармашылығына арналғанын байқадық. Ақмарал Қайназарова мен Ботагөз Нұрпейісова өз шығармашылығында қазақ және үнді мәдениеттерінің дәстүрлерін үйлестіріп, жалпыадамзаттық құндылықтарды біріктіруге күш салған.

Ботагөз кескіндемелері жарқын, қанық түстермен, жанды, темпераментті жазумен, жеңіл фактуралық пысықтаумен, айқын қарама-қайшылықтармен, тұтастық пен монументалдылықпен сипатталады. Көрме Қазақстан мен Үндістан арасындағы дипломатиялық және мәдени қатынастардың орнағанына 30 жыл толуын мерекелеуге арналыпты.