Сенат Төрағасы Біріккен Араб Әмірліктерінің Қазақстандағы елшілігінде болған кезде көңіл айту кітабына жазба қалдырды.
Мәулен Әшімбаев шейх Халифа бен Заид Әл Нахайян мұсылман әлеміндегі жарқын көшбасшылардың бірі және Қазақстанның тату досы болғанын атап өтті.
«Ол біздің елдеріміз арасындағы екі жақты әріптестікті дамытуға зор үлес қосты. Біздің елімізде жүзеге асырылған маңызды әлеуметтік, инфрақұрылымдық және инвестициялық жобалар оның есімімен байланысты», деді ол.
Сенат Төрағасы атап өткендей, 15 мамырда Мемлекет басшысы Қасым-Жомарт Тоқаев Әбу Дабиге барып, шейх Халифа бен Заид Әл Нахайянның қайтыс болуына байланысты жеке көңіл айтқан болатын.
«Шейх Халифа бен Заид Әл Нахайян Біріккен Араб Әмірліктерінің нағыз көшбасшысы ретінде мемлекеттің өсіп-өркендеуіне ауқымды үлес қосты. Ол сондай-ақ Қазақстан мен Әмірліктер арасындағы қарым-қатынастың негізін қалауда және өзара достық пен ынтымақтастықты нығайтуда үлкен рөл атқарды. Оның екіжақты байланысты арттыруға сіңірген еселі еңбегін әрдайым зор құрметпен еске аламыз. Сіздердің қайғыларыңызға ортақтаса отырып, жеке өзімнің және Сенат депутаттарының атынан қайғырып көңіл айтамын», деп атап өтті Сенат Төрағасы.
Біріккен Араб Әмірліктерінің Президенті және Абу-Даби билеушісі, Жоғары мәртебелі шейх Халифа бен Заид Әл Нахайян 2022 жылдың 13 мамырында жұмада қайтыс болған еді. Ол 2004 жылдың 3 қарашасынан бастап БАӘ президенті және Абу-Даби билеушісі болды.
