«Қазір құқық қорғау органдарының жұмысына байланысты сыни пікір көп екенін білемін. Тәртіп орнату кезінде үйреншікті тәсілге салу салдарынан парасатты бизнеске кесірі тиетін кездер болуы мүмкін. Сондықтан ашық түрде мәлімдеймін: «таудан сел жүрсе, етектегі тасты ала кетеді» деген тәмсілге салуға жол жоқ», деді Президент кәсіпкерлермен кездесуде.
Оның айтуынша, осындай фактілер болса, әр іс бойынша арнайы тексеру шаралары жүреді, білікті баға беріледі.
«2019 жылы өз Жолдауымда бизнестің жұмысына заңсыз кедергі келтіру - мемлекет мүддесіне қайшы қылмыс ретінде қаралуы керектігін айтқанмын. Бұл - Бас прокуратураның жұмысы. Күрес алаяқтармен жүруі керек. Қайталап айтамын, алаяқтармен, аферистермен күресу керек. Бірақ «дәрі деп бергені удан бетер болуына» жол беруге болмайды», деді Мемлекет басшысы.
