Аймақтар • 23 Мамыр, 2022

Ұлағатқа ынтықтардың ұмтылысы

«Абай оқулары» байқауының облыстық кезеңіне жүзден астам оқушы қатысып, бақ сынады. Білім мен білік таразы басына тартылған кезде ұлағатқа ынтықтардың ұмтылысының көптігі менмұңдалап тұрды.

Байқал БАЙӘДІЛ

Облыс орталығындағы Абай атындағы дарынды балаларға арналған №3 облыстық мамандандырылған мектеп-интернатта жоғары сынып оқушылары арасында байрақты бәсеке өтті. Мазмұнды іс-шараның ұйымдастырушысы – облыстық білім басқармасының дарынды балалар мен талантты жастарды анықтау және қолдау жөніндегі орталығы. Алты аталым бойынша өткен шығармашылық байқауда Астрахан, Бурабай, Зеренді, Аршалы аудандары мен Степногорск қаласынан қатысқан жасөспірімдер өз бойларындағы білім мен білікті жарқыратып көрсетіп, ұлы хакімнің ұлағатын қаншалықты сіңіргендіктерін айқын аңғартып, көш бастады.

Әсіресе, Астрахан ауданынан келген Оразалы Ханат пен Айым Рамазан алғашқы екі аталым бойынша өзге құрбыларынан оқ бойы озып шықты. Ал «Абайдың ақын шәкірттерінің шығармалары» аталымында бурабайлық Іңкәр Дәулет, «Көңілім әнді ұғады» аталымында зеренділік Ақерке Закер тұла бойларындағы талант ұшқынын танытты. Аршалылық Зейнеп Сағынтай мен Степногорск қаласынан келген Ділназ Сағайқызы да ерен жүйріктер қатарынан көрініп, жақсы қырларынан танылды.

Кіл жүйріктер жиналған білім бәйгесінде маңдайы жарқырап, топтан озған жасөспірімдер «Абай оқуларының» республикалық кезеңіне жолдама алды. Ең бастысы, ұлы Абайдың ұлағатын енді қайтып өшпестей етіп зерек көңілге тоқыған жүзден астам өреннің бойындағы ұмтылысты көріп, келер күндердің көкжиегіне деген сенімді еселедік. Түйсіне білгенге аз олжа емес-ау.

Көкшетау

Күннің маңызды және өзекті жаңалықтарын «Егемен Қазақстан» телеграм каналынан оқыңыз