Жиында Мәжіліс депутаттары Қазыбек Иса, Аманжол Әлтай, Ш.Шаяхметов атындағы «Тіл – қазына» орталығының директоры Ербол Тілешов, Нұр-Сұлтан қаласы Тілдерді дамыту және архив ісі басқармасының басшысы Сәкен Есіркеп, Павлодар облысының білім беру басқармасы, Баянауыл ауданы білім беру бөлімінің Қ.Кемеңгерұлы атындағы жалпы білім беретін орта мектеп директоры Мадиян Кабдуова, Қазақстан Жазушылар одағы Нұр-Сұлтан қалалық филиалының директоры Дәулеткерей Кәпұлы қатысып, құттықтау сөздерін айтты.
Конференцияда ҰҒА академигі Дихан Қамзабекұлы, Л.Н.Гумилев атындағы ЕҰУ қазақ әдебиеті кафедрасының профессоры Серік Негимов, М.Әуезов атындағы Әдебиет және өнер институтының бас ғылыми қызметкері Гүлжаһан Орда, филология магистрі, Еге университеті Түрік әлемін зерттеу институтының қызметкері Диляра Гокче, әдебиеттану бойынша PhD докторы Бекарыс Нұриман, т.б. ғалымдар мен зерттеушілер баяндама жасады.
Келген қонақтарға білім ордасының басшысы Арай Мұхаметжанова мектептің жетістіктері мен инновациялық және шығармашылық жұмыстардың көрмесімен таныстырды. Осыдан соң Қошкетану орталығында қаламгер мүсінінің салтанатты түрде ашылуы болды.
Мүсінді ашу құрметі Қошке Кемеңгерұлының немересі, ардагер ұстаз, «РФ Білім беру ісінің үздігі» төсбелгісінің иегері Ризабек Нарманбетұлы мен қазақ жерін Лениннің алдында қорғап, шекарасын шегендеген Әлімхан Ермекұлының, заңгер, этнограф Жақып Ақбаевтың және халық композиторы, өткір тілді суырып салма ақын Иманжүсіп Құтпанұлының ұрпақтарына берілді.
Ғылыми конференция соңында қарар қабылданып, бекітілді. Конференциядан кейін мектептің талантты оқушылары Қошке туындыларын мәнеріне келтіре оқыды. Қазақ тілі мен әдебиеті пәнінің мұғалімі Жанат Егінбайқызының жетекшілігімен мектептің жас мамандарынан құралған «Жас қанат» театрының әртістері Қошкенің 1926 жылы Қызылорда қаласында Мемлекеттік ұлт театрының ресми ашылуында қойылған «Алтын сақина» пьесасын сахналады. Салтанатты іс-шара Қошке ұрпақтары және мектептің домбырашылар ансамблінің орындауындағы күмбірлеген күймен түйінделді.