Турнирді ұйымдастырушылардың бірі Марат Дәуітовтің айтуынша, балалар арасында үш айға дейін созылған мұндай ірі жарыстар өңірде 2005 жылдан кейін өтпеген көрінеді. Сондықтан биыл бірінші рет жалауын көтерген мектеп баскетбол лигасы облыстағы айтулы оқиғалардың бірі екені сөзсіз.
Спорт жанашырлары келешекте аталған баскетбол лигасының ауқымы бұдан да кеңейе түсіп, бүкіл облыс мектептерін қамтитынын айтады. Жарысқа биыл баскетбол спорты жақсы дамып келе жатқан Қостанай мен Рудный мектептерінің оқушылары ғана қатысып отыр. Жас баскетболшылар алдымен ішкі қалалық жарыстарда іріктеу жарыстарында бақ сынасты. Одан сүрінбей өткен үздік командалар суперфиналда кездесті.
– Турнирді екі кезеңге бөліп өткізуге тура келді. Алдымен Рудныйда, одан кейін облыс орталығында ойындар өтті. Биыл тұңғыш рет ұйымдастырылып отырған мектеп баскетбол лигасының қанатқақты жоба екенін айта кету керек. Бұл жоба аясындағы жарыстарды келесі оқу жылы ертерек қолға аламыз. Қазан айының екінші жартысынан бастап, 2023 жылғы сәуірдің ортасына дейін аяқтауды жоспарлап отырмыз. Мектеп баскетбол лигасының басты мақсаты – балалар арасындағы жарыстардың жүйелі өтіп тұруын қамтамасыз ете отырып, енді ғана өсіп келе жатқан талапкер баскетболшылар арасындағы ішкі бәсекені арттыру. Өйткені спортшының шеберлігі жоғары бәсеке жағдайында ғана шыңдалады, – дейді Марат Дәуітов.
Облыстық спорт басқармасындағылардың сөзінше, жарыс өте бастаған үш айдың ішінде оқушылардың шеберлік деңгейінің едәуір өскені байқалады, командалардың ойын өрнегі де айшықтала түскен. Бұл орайда мамандар денешынықтыру мұғалімдерінің еңбегі орасан зор дейді. Ал турнирді бастан-аяқ бақылап шыққан сарапшылар жарыс барысында балалардың жақсы ойын техникасын, кейбір командалардың кездесуде әбжіл қимылдап, шапшаң шабуылдап, тактикалық ойынның озық үлгісін көрсете білгенін атап өтті.
– Алдымен мектеп баскетбол лигасын тиісті деңгейде ұйымдастыруға қолдау көрсеткен Қостанай және Рудный қалаларындағы білім бөлімдеріне шынайы ризашылық білдіргім келеді. Турнирге қатысушыларға естелік сыйлықтар, дипломдар мен кубоктар сатып алып, қаржылай көмек көрсеткен демеушілерімізге де рахмет. Ол кісілердің орны қашанда бөлек. Биыл жарысқа қатыса алмаған көптеген білім мекемесі енді бұл турнирге үлкен қызығушылық танытып отыр. Сондықтан алдағы жылы жарысқа қатысатын командалардың саны едәуір көп болады, – деді Марат Дәуітов.
Мектеп баскетбол лигасының суперфиналында 4-6 сыныптар бойынша қыздар арасында Қостанай қаласындағы №4 орта мектептің командасы, ал ұлдар арасында Қостанайдағы №1 мектеп-лицейдің оқушылары жеңімпаз атанды. 7-8 сыныптар арасында Рудныйдың №5 гимназиясы бірінші орынды жеңіп алды. Ал 9-11 сыныптар арасында ешбір командаға дес бермеген №5 Қостанай қалалық орта мектебінің ұлдары мен №29 орта мектептің қыздары жеңіс тұғырынан көрінді.
Қостанай облысы
