Суретті түсірген Ерлан ОМАР, «EQ»
Осы тарихи оқиға қарсаңында өткен аппараттық кеңесте Қарағанды облысының әкімі Жеңіс Қасымбек жаңадан құрылған облыстың бірі – Ұлытау өңіріне қызмет етуге баратын әріптестері алдында сөз сөйлеп, оларға бірлесіп атқарған жұмыстары үшін алғыс айтты.
Өңір басшысы Жезқазған, Сәтбаев, Қаражал қалалары және Ұлытау, Жаңаарқа аудандарын мекен еткен тұрғындар үшін өзекті мәселелердің шешімін тапқанын бірлесе атқарған жұмыстың нақты жемісі деп бағалады. Сонымен қатар ол жаңа облыстың болашағы зор екенін және оның өңірдің дамуына игі ықпалын тигізетініне сенім білдіретінін атап өтті.
– Сіздер жаңа өмірге қадам басқалы тұрсыздар. Осынау шешуші сәтте сәттілік тілеймін, – деді Жеңіс Қасымбек.
Сондай-ақ өңір басшысы әкімшілік-аумақтық бөліністің екі облыстың экономикасына қандай әсерін тигізетіні жөніндегі сұраққа да егжей-тегжейлі жауап берді. Ең алдымен ол өңірлерді бөлгеннен Қарағанды облысы да, Ұлытау өңірі де еш ұтылмайтынын атап өтті.
– Бюджетке түсетін салықтар мен республикалық жарна пропорционалды түрде бөлінеді. Қарағанды облысына жоғары тұрған бюджеттен түсетін салықтар мен трансферттер аумақтық жағынан Ұлытау облысы құрылған аймақтарға түседі. Қалғанының бәрі облыстардың өздерінің кірісі, – деп түсіндірді Ж.Қасымбек.
Бұдан бөлек, ол қазіргі уақытта «Қазақмыс» корпорациясы Жезқазған қаласына кәсіпорындарын қайта тіркеуден өткізіп жатқанын айта келіп, жаңа облыс пен Жезқазған қаласының дамуына игі ықпалын тигізетін алғышарттардың жеткілікті екеніне назар аударды. «Екі өңір де экономика құрылымы мен халқының саны жағынан ұқсас болады», деп ой тұжырды облыс әкімі.
Бүгінде Мемлекет басшысының тапсырмасы бойынша, Жезқазған өңірінде үш ірі жоба қолға алынған. Соның ішіндегі ең маңыздысы – ұзындығы 43 шақырымды құрайтын «Үйтас-Айдос» су құбырын қайта жаңғырту. Бұл жоба жүзеге асқанда, бұрыннан бері қала тұрғындарын қинап келе жатқан сапалы ауыз сумен қамтамасыз ету мәселесі оң шешімін табады.
Одан кейінгі Жезқазған-Ұлытау өңірінің халқын толғандырып келе жатқан ірі мәселенің бірі – жол проблемасы. Бұл тұрғыда облыс әкімі ұзындығы 208 шақырым болатын «Қызылорда – Жезқазған» жолы және «Жезқазған – Қарағанды» тас жолының 513 шақырымын қайта жаңғырту жоспарланғанын жеткізді. Қазіргі уақытта Қызылорда – Жезқазған бағытында мердігерді анықтау бойынша конкурстық рәсімдер жүргізіліп жатыр екен. Ал Жезқазған – Қарағанды жолы бойынша жобалық-сметалық құжаттар әзірлену үстінде.
Аппарат жиынын қорытқан облыс әкімі Жеңіс Қасымбек жаңа Ұлытау облысының құрылуы бір үйдің баласындай, бір қолдың саласындай өңірлердің экономикалық-әлеуметтік тұрғыда дамуына тың серпін беретінін сенімді түрде мәлімдеді.
Ал мұның алдында Қарағанды облыстық мәслихаты өзінің кезектен тыс XIV сессиясын өткізіп, Ұлытау облысының құрылуына байланысты мәслихатты қайта ұйымдастыру туралы шешімді талқылаған болатын. Осы құжатқа сәйкес, құрамында 26 депутат бар Қарағанды облыстық мәслихатына және 12 депутаттан тұратын Ұлытау облыстық мәслихатына бөлу арқылы Қарағанды облысының мәслихатын қайта ұйымдастыру ұсынылып, ол бірауыздан қабылданды. Айта кететін бір жайт, әкімшілік-аумақтық бөлініс кезінде мәслихат депутаттарының тұрғылықты жері мен ресми тіркелген мекенжайына назар аударылды.
Қарағанды облысы
