Елтаңба авторына деген құрмет

Конференция жұмысын тарих ғы­лым­­дарының докторы, М.Қозыбаев атын­дағы СҚУ профессоры Ақмарал Ыбыраева ашып, жүргізіп отырды. Құр­метті қонақтар қатарында қазақтың Тұңғыш ғарышкері, Кеңес Одағының Батыры және Халық Қаһарманы Тоқтар Әубәкіров, Қазақстанның еңбек сіңірген сәулетшісі Серік Рүстембеков, «Дүние жүзі түркі халықтарының кон­гр­есі» қоғамдық бірлестігінің пре­зи­денті Арман Ақмұқанов, Л.Н.Гу­ми­лев атындағы Еуразия ҰУ профес­со­ры Серік Негимов, Шот-Аман Уә­ли­ха­нов­тың қызы Баян Уәлиханова және т.б. болды.

Алғашқы сөз облыс әкімінің орынбасары Ғани Нығыметовке беріліп, ол облыс әкімі Құмар Ақсақаловтың құттықтау сөзін оқып берді. «Өмірден озғанына бір жылдан асқан атақты жерлесіміз Шота-Аман Уәлиханов артына өшпес із қалдырған жан. Біз оны тамаша архитектор, белсенді қоғам қайраткері, Елтаңбамыздың авторы ретінде әрқашан мақтан етіп, құрмет тұтамыз» делінген құттықтауда.

Осыдан кейін сөз Тоқтар Әубәкі­ров­ке берілді. Ол өзінің Шота-Аман Уәлихановпен алғаш танысқан сәтінен қызықты естелік айтып берді. «1991 жылдың қазан айында «Союз ТМ-13» кемесімен ғарышқа ұшарда бір топ қазақстандық Байқоңырға келіп, бізді шығарып салды. Соның ішінде Шота-Аман Уәлиханов ағамыз да бол­ған еді. Ол маған Қазақстанның бо­­лашақ Елтаңбасының суретін көр­се­тіп, өзінің осы жобамен ұзақ жылдар бойы айналысып жүргенін, енді соны өзіммен бірге ғарышқа апарып келуді өтінетінін жеткізді. Гербтің жобасы қатты ұнағаны сондай, мен оны өзі­міз­дің басшыларымызға көрсетіп, қазақ экипажының символы қылуды ұсындым. Олар қарсы болмады. Сөйтіп, Гербтің жобасын ғарышқа шы­ғарып келген едім. Келген соң жобаны Шота-Аман ағамыздың қолына тапсырдым. Кешікпей Елтаңбаны таңдаған кон­курста осы жоба жеңіп шығып, Қа­зақ­станның рәмізіне айналды. Шота-Аман ағамыз оның ғарышқа шығып келгенін әрқашан қуанышпен айтып, «оның жолын сен аштың» деп маған ризашылығын білдіріп отыратын. Ол өз халқының нағыз айнымас патриоты еді», деді ол.

Қазақстан Сәулетшілер одағының төрағасы Серік Рүстембеков, Сол­түс­тік Қазақстан Мемлекеттік архи­вінің ди­рек­торы Сәуле Мәлікова, сондай-ақ Арман Ақ­мұ­қанов, Баян Уә­лихановалар да тамаша ес­те­лік­тер айтты. Ал Серік Негимов «Ш.Уәлихановтың ғұмыр­на­масы мен­ ғы­лыми көзқарасы», KAZGOR жо­ба­лау академиясының пре­зиденті Айдар Тә­ті­ғұлов «Ш.Уә­ли­ха­новтың KAZGOR-мен шығармашылық байланысы», осы ұйымның бас сәулетшісі Тоқтар Ералиев Ш.Уәлиханов туралы есте­лік­тер, Әл-Фараби атындағы Қазақ ұлттық университетінің профессо­ры Мұ­хамбетқали Бүркітбаев «Ш.Уә­ли­ханов өмірінің өнегелері», Әл-Фа­раби атындағы Қазақ ҰУ профессоры Гүлнәр Мұқанова «Ш.Уәлиханов шығар­машылығындағы ұлттық жәді­гер­­лерді жасаушының стилі» деген та­қырыптарда баяндамалар жасады. Барлық баяндама жиналған қа­уым­ның қызығушылығын тудырып, Шота-Аман Уәлихановтың өмірі мен шы­­ғармашылығының Қазақстан рәміз­де­рін жасауға қосқан үлестерін айқын паш етті.

Конференцияның соңынан «Шот-Аман Уәлихановтың шығармашылық мұрасы» атты жеті томдық жинақтың тұса­уы кесілді. Сонымен бірге Сол­түс­тік Қа­зақстан өңірінің өнегелі табыс­тарына үнемі үн қосып жүретін және рәміздер туралы бірнеше та­нымдық мақалалар жазған профессор Серік Негимовке «Сол­түстік Қа­зақ­стан­ның Құр­мет­ті азаматы» атағы бе­рілді.