ОТБАСЫЛАР ЖАРЫСЫ

Талдықорған қаласындағы  “Өркен” спорт кешенінде “Бірлігіміз жарасқан!” акциясы және Қа­зақстан Республикасы Прези­дентінің жүлдесі жолын­да өтіп жатқан ІV Халық спорты ойын­дарының аясында “Әкем, шешем және біз – спорт­шы­лар отбасымыз” атты спортшы отбасылар арасын­дағы облыс­тық жарыс болып өтті. Жыл сайын өткізіліп, жұрт арасында үлкен қолдауға ие болып отыр­ған шарапатты әрі шаттықты шараға Алматы облысының бар­лық аудандары мен қала­ла­рында өткен осы тектес сайыс­тарда көзге түсіп, жеңімпаз атан­ған  14 команда құра­мын­дағы  42 адам қа­тысты. Олар жа­рыс бағдарла­масына сай биден, жеңіл атлетикалық эстафетадан және арқан тартудан өзара күш сынасты. Елбасының Жолдауында атап көрсетілгендей, бұқаралық спорт­ты дамыту, отбасы бірлігін ны­ғай­ту және халық арасында сала­матты өмір салтын насихаттай отырып, дені сау білімді ұрпақ тәрбиелеу мақса­тында өткізіліп отырған  акция­ның басты ұйым­дас­тырушылары – Алматы облы­сының туризм, дене тәрбиесі және спорт бас­қармасы мен  Қа­зақстанның Аза­маттық альянсы. Шараның көп­шілік арасында кеңінен қолдау табуы өз кезегінде  күні ертең мемлекеттің мәрте­бе­сін өсіретін білімді де білікті, денсаулығы мықты әрі жігерлі жастардың көптеп шығуына оң әсерін тигізетіні анық. Спортшы отбасылар арасын­дағы облыстық жарыстың ашылу салтанатында бірінші болып сөз алған облыстық туризм, дене тәр­биесі  және спорт басқарма­сының бастығы Тұратбек Шара­пиев биылғысымен  төртінші рет өт­кізі­ліп отырған Қазақстан Республи­касы Президентінің жүлдесі жо­лындағы Халық спор­ты ойындары­ның ұлтымыздың болашағы үшін аса үлкен мәні мен мағынасы бар­лығын ерекше атап өтті. Сонымен бірге, жел­кілдеп өсіп келе жатқан  жас ұрпаққа беретін  тәрбиелік әсері де мол шара екенін айта келе, жа­рысқа қатысушы спортшы отбасылар  командаларының барлығына сәттілік тіледі. Жарыс шымылдығы жас би­шілердің әсемдік пен икемділікті паш еткен өнерімен ашылып, жарысқа шығар кезді асыға күтіп тұрған  спортшы отбасылар мен олардың  жанкүйерлерінің көңілдерін бір көтеріп тастады. Көп ұзамай жарыс та басталды. Споршы отбасылар облыстық бәсекеге барынша дайындал­ғандарын байқатты. Сондықтан жарыс түрлерінің барлығындағы өзара сайыс тым тар­тысты­лы­ғымен есте қалды.  Жан­күйерлер Же­тісу жерінде спортты серік еткен отбасылар­дың  қатары арта түскенін және олардың шебер­лік­терінің жыл сайын арта бас­та­ғанын өз көздерімен көрді. Жа­рыстың қорытындысына ке­лер болсақ, бірінші орынды  бұ­ған дейін де осындай сайыстарда Талды­қорған қаласының намы­сын қорғап,  облыстың екі мәрте чем­пионы атанған Урмановтар отбасы еш талассыз жеңіп алды. Бұл команданың капитаны Махмуд Урманов көгалдағы хоккейден спорт шебері болса, әйелі Ольга да осы спорт сала­сында біраз биіктерді бағын­дырған. Екінші орынды  Ақсу ауданынан келген Бауыржан отбасылық командасы иеленсе, үшінші орын Талғар ауданының атынан сынға түскен Тұрсын отбасылық командасының енші­сіне бұйырды. Облыстық бәсекеден озып шыққан команда  Орал қаласын­да өтетін республикалық жарыс­та Алматы облысының намысын қорғайды. Күмісжан БАЙЖАН, Алматы облысы.