Той басталардан сәл ғана бұрын артынып-тартынып, барлық асай-мүсейлерін құшақтап, тойдың асабасы мен әншілері де жетті. Оларға ілесіп фотоға түсірушілер келді. Әйтеуір, құдалыққа келгендей бір қора адам. Асабамыз – жүзіктің көзінен өтер пысық жігіт. Таңдайы да тақылдап тұр. Әп-сәтте жұртшылықты иіріп, үйіріп әкетті. Оған біз де қуанып, «мынау, бір болайын деп тұрған өнерлі бала екен» деп, мәз-мәйрам болдық. Той иесі екібастан есі шығып кеткен.
Сонымен көп күткен той да басталды. Обалы нешік, асаба да, оның қасында үйіріліп жүрген жігіттер де шетінен өнерлі екен. Неше түрлі әнді нақышына келтіре шырқап, биді де түбін түсіре билеп, қуаныштың сәнін кіргізді. Әсіресе жастардың делебесін қоздырды. «Той болғасын, осылай болсын» деп біз отырмыз. Бір кезде байқаймын, мен мақтап, мадақтап отырған асабамыз, әр сөзін қазақша бастап, ортасына келгенде орысша шүлдірлеп кетеді. Бір емес, екі емес… үнемі… жан-жағыма қарасам, тойға келгендердің бәрі де – өз ағайындарымыз. Тек әнебір шеткі үстелде ағамыздың әріптестері ретінде екі-үш өзге ұлт өкілдері отыр. Бірақ олардың асабаның сөзіне құлақ тігіп отырғанын көрмедім. Өздерімен-өздері… «Сонда бұл кімге орысша сөйлеп отыр» деп қоямыз. Бір кезде қасымда отырған жасы үлкен ағамыз шыдамай кетті де: «Інішек, осы тойға келгендердің бәрі де өзіміз, неге бастан-аяқ өз тілімізде жүргізбейсің, өзге тілде шүлдірлеп, миымызды атала қылып жібердің ғой» деп еді, «аға, бәрімізге де түсінікті тіл ғой» деп иығын қиқаң еткізіп, өтіп кетті.
Жалпы, біздің бабаларымыз той жасаса да оның шегі мен шетін біліп, мөлшерден асырмаған. Бүгін оның бәрі «ескілікке» баланып, ертегідей той өткізуге құштармыз. Анығын айтқанда, қазақы тойдың өзі шоу-бизнестің бір бөлшегіне айналды. «Ойбай, ананың тойына әнебір әйгілі әнші келіп, ән салыпты» десе, оған аузымыздың суы құрып тамсанамыз.
Қазір әлеуметтік желілерден той үстіндегі әдепсіз қылықтардың үдеп бара жатқанын бейнелейтін түрлі видеороликтерді көріп жүрміз. Кәдімгі, тойдың үсті… Бірақ жөнсіздік көрсеткендерге «әй, тоқтат» деп отырған бір адам жоқ, бәрі мәз-мәйрам күлкіге кенелген… Ау, сол жерде әлгі әдепсіздікті тыятын аузы дуалы қарияның қалмағаны ма?
