Операция жасалған жандардың көбі – буын ауруларымен ауыратын 50 жастан асқан адамдар. Алғашқы пациент оң жақ тізе буынының артрозы бар 28 жастағы азамат болды. Ғалымдардың айтуынша, ұқсас диагноздармен емдеудің бірнеше әдісі бар, бірақ гидрогельді қолдану – зақымдалған буындар мен шеміршекті толығымен қалпына келтіруге мүмкіндік беретін жалғыз әдіс.
Жаңа техниканың негізгі әзірлеушісі – Ұлттық биотехнологиялық орталық жанындағы Дің жасушалары зертханасының меңгерушісі Вячеслав Огай.
«Үш ай ішінде фибринді гидрогельдің клиникалық сынақтарында 15 еріктіге операция жасадық. Пациенттердің басым бөлігі – жасына байланысты буындарында өзгерістері бар адамдар. Операция 15-25 минутқа дейін созылады. Сондай-ақ барлық операция штаттық режімде жасалды. Науқастар алты айда сауығып кетеді, бірақ егде жастағылардың оңалуына ұзағырақ уақыт кетуі мүмкін. Осы кезең өткеннен кейін алғашқы нәтижелерді жариялай аламыз», деді ғалым В.Огай.
Клиникалық сынақтар академик Н.Батпенов атындағы Травматология және ортопедия Ұлттық ғылыми орталығында наурыз айында басталды. Зерттеудің алғашқы екі кезеңі осы жылдың соңына дейін жалғасады. Кейін бірнеше орталықта клиникалық сынақтар өткізіледі. Оның нәтижесінде биомедициналық препаратты тіркеу, оны жаппай өндіру және буын аурулары бар адамдарға кеңінен қолдану жоспарланып отыр. Процедураны ақылы да, квота бойынша тегін де алуға болады.
Айта кету керек, әдістеме Білім және ғылым министрлігінің қаржылай қолдауымен жасалған. Ғылыми жобаға Ұлыбритания елшілігі қызығушылық танытып отыр.
Аружан НАҒАШЫБАЙ,
Л.Н.Гумилев атындағы Еуразия ұлттық университетінің 2-курс студенті
