Тағыл құбылысы

– Осы ауылға әкім болғаныма, міне, биыл 25 жыл болды. Тұқымында егіз бол­маған ерлі-зайыптылардың біздің ауылға келіп қос сәбиден сүйгенін кө­ріп, таңғал­ғанымыз бар. Тағылдың табиға­ты­ның тылсым күші ме, топырағының әлде ауасы мен суының ерекше бір қасиеті бар ма – бұл тылсым құпияның сырын ешкім білмейді. Негізі, ауылда егіздердің тууы Кеңес өкіметі уақы­тынан бар. Оған дейін де болуы мүмкін, – дейді ауылдық округтің әкімі Сағынай Сүндеталин.

Әкімнің айтуынша, Тағылда 1955 жылдары егіздер көп туыпты. Ол кезде құрсақ көтерген әйелдердің көбі екі бала­дан босана берген көрінеді. 1980 жылдары егіздер тағы көбейіп, одан кейін біртіндеп саябырсып барып тоқ­тайды. Араға ширек ғасырдай уақыт салып, екі мыңжылдықтың алғашқы он­жылдығында жұмбақ құбылыс тағы қай­таланады.

– Егіздердің ұлты да әр түрлі. Қа­зақ, орыс, украин, неміс, башқұрт, татар, әзербайжан бар. Бұл өзі Тағылға Тәңірдің берген сыйы болып тұр. Ал енді ауыл­да егіз бала тумағалы он бес жыл­­ға жуықтады. Тағы бір 5-10 жылдан кейін Тағылда егіз­дер шілдеханасы көбейеді деп бол­жауымызға болады, – дей­ді әкім.

Бір кездері ғалымдар «Тағыл құ­былысының» сырына үңіліп, зерттеу жүргізеді екен деген сыбыс шық­­қан екен. Алайда осы уақытқа дейін ауылға ат ізін салған ешкім болмапты.

Ауыл әкімі 28 егіз, 56 перзенттің бар­лығының аты-жөнін жатқа біледі. Ең кішілері 7-сыныпта оқиды деп отыр. Олардың барлығы да тәртіпті, зерделі, қағілез балалар екен.

Тағылдағы Шықтыбаевтар әул­е­тін­дегі егіздер еліміз тәуелсіздік алған жылы дүниеге келіпті.

– Біздің тұқымда бұрын-соңды егіз болған емес. Бірақ 1991 жылы келініміз Данияр, Бақтияр есімді егіз бала тапты. Екеуі де оқуда озат, қатарларының алды болып ержетті. Бүгінде отыздан асты. Қазір басқа ауылда жұмыс істейді. Жал­пы, бұл ауылдың келіндерінің егіздеп бала табуы кездейсоқтық емес, – дейді Мәлік қария.

Егіз қыз тәрбиелеп отырған Ольга Колчанова да Тағылда беймәлім бір тылсым күш бар екеніне кәміл сенеді.

– Людам мен Лизамның құрсағыма бітуіне осы өлкенің тылсым күшінің әсері болды. Өйткені менің де, жол­да­­­сымның да тұқымында егіздер бол­маған. Жарық дүниеге келгелі екеуі бір-бірінен бір елі ажырамай, өзара қамқор, тату болып өсті. Қазір 34 жаста. Жалпы, біз­дің ауыл­дағы көп үйде егіздер тұрады. Кө­­ше­де қатар кетіп бара жатқан егіз ба­ла­лар жиі кездеседі. Бұл біз үшін үйрен­шік­­ті көрініске айналған, – дейді Ольга Кол­­чанова.

Аудан орталығы Сарыкөлдің ірге­сінде, темір жолдың бойында жатқан ша­ғын ауылда бүгінде 1 040 адам тұрады.

Қостанай облысы