Ақ қағаз бетінде көмір мен соусты қолдану арқылы кескіндеме өнерінен құпия іздеген жас суретші Әсемқұл Бейбіттің шығармашылығы ерекше. Қарапайым тәсілмен орындалғанына қарамастан, графика парақтарында қылқалам иесінің эмоционалдық күйзелісі мен ішкі жан-тебіренісі байқалып тұрады.
Суреткер композицияны ұтымды шешу үшін, форманы қалыптастыруға ерекше мән береді. 2015 жылы жазылған «Қара тон» туындысы сөзімізге дәлел. Шығармада қара тон жамылып, ұйықтап жатқан әйел адам бейнеленген. Мұнда өмірдің азабы ауыр ұйқымен астасып жатыр. Ананың қара тонды жамылып сыртқы дүниеден оқшаулануы, өзін шектеуі, қорғануы, сонымен бірге дәрменсіздігі байқалады.
Қара тон – шаршап-шалдығудың белгісі. Ұйқы – бұл кез келген адамның бір уақытқа тұйықталуы, құпиялануы. Суретші композицияны жоғарғы нүктеден алып жазған. Яғни кеңістікте тереңдік қалыптаспай, керісінше, жазықтық бетіндегі формалар ақ қағаз бетінде ойнап, көлем қалыптастыра түскен. Мысалы, тонның астындағы адамның дене пішіні, тонның жеңдерін жазуы. Бар-жоғы қос түс әрі түрлі штрихтың өзара күрделі байланысы арқылы әр заттың, форманың көлемі нанымды бейнеленген. Бақсаңыз, композициядағы кішігірім детальдар да қарапайым шешілген. Жерге төселген алаша және жастықтар бірнеше жолақпен өрілген. Шәркейі – бұл үйдің жайлылығын білдіреді. Ол өзінің әлемі, әйел адамның жеке кеңістігі.
Автор бұл жұмысты жылдам тамашалауға емес, асықпай суретшінің қимылымен, ойымен шарпысып, оның бояумен баяндалған қарапайым сюжетін көруге асығады. Қанша жерден қарапайым болса да, мейірімділік, махаббат сезімдері арқау болған шығарма елең еткізбей қоймайды. Суретші өзінің жеке әлемін жасау арқылы, жалпы, өмірдің философиясын ұғынуға тырысады.
