Бақытты отбасын алғашқылардың бірі болып Қостанай қаласының әкімі Марат Жүндібаев құттықтады.
– Сіздерді көптен күткен нәрестелеріңіздің өмірге келуімен құттықтаймын. Бұл – өте үлкен қуаныш әрі ғажайып оқиға. Мұндай жағдай соңғы жиырма жыл ішінде бесінші рет, он жылда үш мәрте қайталанып отыр. Сәбилеріңіздің дені сау болсын! Өңір тұрғындары 2021 жылдан бастап «Аңсаған сәби» бағдарламасының нәтижесін көріп отыр. Аталған бағдарлама аясында экстракорпоралды ұрықтандыруға берілетін квота мөлшері 7 есе артты. Бұл – жас отбасыларға көрсетіліп жатқан орасан зор қолдау. 2021 жылы Қостанай облысында ЭКҰ көмегімен 72 бала дүниеге келді, – деді әкім.
Қала әкімі үшемнің ата-анасына 1,5 млн теңгенің сертификатын тарту етті.
– Біз жеті жыл перзент күттік. Содан кейін экстракорпоралды ұрықтандыру арқылы бағымызды сынап көруге тура келді. Бақытымызға орай, алғашқы мүмкіндіктен-ақ әйелім құрсақ көтерді. Әуел баста егіз болар деп жүрген едік, УЗИ-ға келгенімізде дәрігерлер маған «Сіз енді көпбалалы әкесіз» деді. Сөйтіп, үшем екенін білдік. Олардың аман-есен дүниеге келуі зор қуаныш. Енді менің ұлым да, қыздарым да бар. Шексіз бақыттымын! – дейді Игорь.
Үшемдердің біреуі – ұл, екеуі – қыз бала екен. Милана, Арина және Артем деп ат қойыпты. Үш бірдей сәбиі дүниеге келген күннің ертесінде Игорь ипотекаға кең пәтер де сатып алыпты. Қазір жөндеу жұмыстары жүріп жатыр екен. Жарты айдан соң қоныс тойын жасамақ.
Қостанай облысы
