«Парламент сөзі» сыйлығының жеңімпаздары марапатталды

Жеңімпаздарға арнайы тапсырыспен жасалған шыны мүсіндер мен дипломдар табыс етілді.

«Үздік баспа жарияланымы үшін» номинациясында «Егемен Қазақстан» газетінің тілшісі Абай Отар мен «Время» газетінің тілшісі Тоғжан Ғани жеңімпаз атанды.

«Үздік телевизиялық сюжет үшін» номинациясында «Хабар 24» телеарнасының тілшісі Назерке Сұлтанқұлова мен «АSTANA» арнасының тілшісі Яна Гладкова марапат алды.

«Үздік бейне-сурет материалы үшін» сыйлығы «Qazaqstan» телеарнасының операторы Советхан Жағиев пен «Informburo.kz» фотографы Герард Ставрианидиге табысталды.

«Үздік интернет және радио материалы үшін» номинациясының иегері – Қазақ радиоларының «Парламент сағаты» бағдарламасының авторы Алмас Байдрахманов, «Tengrinews.kz» интернет-ресурсының тілшісі Мейірім Смайыл, «Baq.kz» ақпарат агенттігінің бас редакторы Ержан Жаубай.

«Арнайы репортаж» номинациясында ҚР Президентінің Телерадио кешенінің қоюшы режиссері Сәуле Көмекбаева және «Еуразия» бірінші арнасының продюсері Гүлфариза Рамазанова және «Азаттық рухы» агенттігінің тілшісі Кристина Гринько үздік деп танылды.

Сонымен бірге «Парламенттік журналистиканы дамытуға қосқан үлесі үшін» «Айқын» газетінің бас редакторы Аманкелді Құрмет пен «ТДК – 42» арнасының тілшісі Әселім Әбілдинова марапатталды.

«Парламент сөзі» арнайы сыйлығы «ҚазАқпарат» халықаралық ақпарат агенттігі мен «31 арна» телеарнасына берілді.

Айта кетейік, «Парламент сөзі» сыйлығы алғаш рет 2017 жылы берілген болатын.