Кешкі сағат 19:00-де басталатын бұл өнер додасы облыс орталығының басты алаңында ашық аспан астында өтті. Көк желекті аппақ қайың мен сұлу қарағайға көмкерілген сахнаға шығатын өнерпаздар қазақ, орыс, татар, башқұрт, әзербайжан, армян халықтарының әндері мен билерін орындап, көрерменге рухани ләззат сыйлады. Әндер мен билерді орындайтындар қатарында өңірімізге белгілі әншілер мен өнер ұжымдары болды. Атап айтқанда Дәмеш Құрманкина, Бүркіт Жаңай, Юлия Стадухина, Анастасия Симонова, Медет Ибадулла, Лаура Күрлеуітова, Ділназ Есжан, Мұрат Бекжанов, Miami, Melomax топтары, «Азия саунд» эстрадалық ансамблі, Bright band тобы және басқалар. Олардың орындауындағы «Жүрегім сен аңсаған», «Қазақ қыздары», «Я люблю», «Сезім сыры», «Маусымжан», «Танцуй со мной», «Сен сұлу», «Бозжорға», «Қайдасың», «Махаббат мұңы», «Шіркін-ай», «Белый флаг» және т.б. әндер кешкі Қызылжардың аспанын әсем әуенге бөледі. Фестиваль кештері әр күн сайын өнердің жаңа жанрын қамтып отырды. Мәселен, бір кеште хореографиялық туындылар болып, би ұжымдары өнер көрсетсе ертесіне эстрада жұлдыздары сахнаға шықты. Дәстүрлі әндер кеші де өз алдына бөлек.
Солтүстік Қазақстан облысы Мәдениет басқармасының ұйымдастыруымен жүзеге асқан осынау өнер кештері тұрғындарға қуаныш сыйлап, көңілдерін көк аспанға көтерді.
ПЕТРОПАВЛ
