«Қазақстандық жанкүйерлер ҚФФ тарапынан қоғамдық тәртіп пен жарыс ережелерін қатаң сақтауға қатысты айтқан үндеулеріне қарамастан Словакиямен өткен матчта трибунадан жасыл алаңға әртүрлі зат лақтырды. Бұл әрекеттер матч делегатының есебіне тіркеліп, УЕФА тәртіптік-бақылау және әдеп инстанциясының жиынында қаралды. Оның қорытындысы бойынша Қазақстан футбол федерациясына 11 625 еуро айыппұл салынды», делінген ҚФФ хабарламасында.
Айта кетейік, УЕФА Қазақстан құрамасын жанкүйерлердің тәртіпсіздігі үшін бірінші мәрте жазалап тұрған жоқ. Бұған дейін наурыз айында Молдовамен өткен ойыннан кейін де 19 250 еуро көлемінде айыппұл салған болатын. Егер мұндай жағдай алдағы ойындарда да қайталанатын болса, онда УЕФА Қазақстан құрамасының кейінгі матчтарына жанкүйерлерді кіргізбеу туралы шешім шығаруы да ғажап емес.
