Астана, Алматы, Қарағанды қалаларында сәлемдеме автоматтары орнатылады

АСТАНА. 30 сәуір. «Қазпошта» акционерлік қоғамы таяуда Астана, Алматы және Қарағанды қалаларына сәлемдеме жіберуге арналған 18 постомат қояды. Орталық коммуникациялар қызметiнде өткен брифингте «Қазпошта» акционерлік қоғамының басқарма төрағасы Асхат Бейсенбаев осылай деді. Бұл туралы «Қазақстан жаңалықтары» хабарлады.

Жиында Асхат Бейсенбаев: «Ағымдағы жылдың екiншi жартысында Қазақстан үшiн мүлдем жаңа қызметтi – постоматтар жүйесiн енгiзудi жоспарлап отырмыз. Бұл банкоматтардың тiкелей баламасы. Бiрақ бұдан ақшаның орнына келген сәлемдемелерді алуға болады. Оны тәулiк бойы қолдануға мүмкiндiк бар. Жаңа iлкi жоба аясында Астанада, Алматыда және Қарағандыда 18 постомат қойылады», – деді. Асхат Бейсенбаевтың айтуынша,  өзге аймақтардан, шетелден ғаламтор арқылы тауарлар сатып алуды халық жиi қолданады. Постоматтар осы тауарларды жылдам әрi еш кедергiсiз алуға мүмкiндiк туғызады. Жолдыбай Базар. Дереккөз: «Қазақстан жаңалықтары». Фото: Itc.ua.