Қаржы институтының меншік капиталы бірден 77,8 пайызға, 698,7 млрд теңгеге дейін өскен. Банк көрсеткіштері реттеушінің пруденциалды нормативтері бойынша минималды талаптарынан асып түседі. Мәселен, меншік капиталының жеткіліктілік коэффициенті (k1) 0,283-ті құраған. Бұл – қазақстандық ірі коммерциялық банктер арасындағы үздік көрсеткіш. Үздік ондықтағы банктер арасындағы біршама жоғары көрсеткіш тек мемлекеттік «Отбасы банк» пен «Ситибанкте» ғана бар. Өз кезегінде Jusan Bank-тің өтімділік коэффициенті (k4) 2,191-ді құрайды. Бұл да тәуір көрсеткіш.
Екінші орында – «Банк ЦентрКредит». Қаржы институтының меншік капиталы бір жыл ішінде 33,6 пайызға, 276,5 млрд теңгеге дейін көтерілген. Бұл цифр – екінші деңгейлі банктердің жиынтық капиталының 5,1 пайызы деген сөз. Банктің меншік капиталының жеткіліктілік коэффициенті 0,135 болса, өтімділік коэффициенті 1,133-ке бағаланған.
Үздік үштікті ең әлеуетті экожүйе құрумен ерекшеленіп отырған Kaspi Bank түйіндейді. Соңғы бір жыл көлемінде қаржы ұйымының меншік капиталы 28,9 пайызға өскен. Теңгеге шақсақ, 488 млрд теңгеге жеткен. Осылайша, Kaspi-дің меншік капиталы бүкіл сектордағы жиынтық капиталдың 8,9 пайызын еншілейді. Банкте k1 көрсеткіші – 0,125, k4 – 1,413-ке тең.
Сонымен қатар екінші деңгейлі банктер активтері биыл мамырдың нәтижесі бойынша 9 пайызға, 37,1 трлн теңгеге дейін ұлғайған. Активтер көлемі бойынша бірінші орында – Jusan Bank (2,4 трлн теңге). Бір жылда қаржы институты актив көлемін 41,6 пайызға арттырған. Екінші орында – 12 ай мерзім ішінде актив көлемін 39 пайызға көбейте алған «Банк ЦентрКредит» (2,7 трлн теңге). Үшінші орында – «Отбасы банк». Тек қана тұрғын үй ипотекасы категориясында жұмыс істейтін бұл банк өз активін бір жыл ішінде 32,9 пайызға арттырған. Жалпы, актив көлемі 3,1 трлн теңгеге бағаланады.
