Бұл жарысқа дүние жүзінің 72 елінен 3 мыңнан артық өнер ұжымдары қатысып, 22-31 шілде аралығында өнер көрсеткен. Кеше жарыс аяқталды, ал бүгін үздік ұжымдардың концерті болады. Қазақстандықтардың жеңісін бүкіл еліміз қуанышпен атап өтуде. Ал солтүстікқазақстандықтардың қуа-нышында тіпті шек жоқ. Облыс әкімі Құмар Ақсақалов өзінің «Инстаграмдағы парақшасында былай деп жазды: «Біздің ұжымымыз финалдық өнер көрсетулерде АҚШ, Ирландия, Аустралия, ОАР, Тайланд, Канада, Германия сияқты атақты елдерден келген барлық ұжымды артқа тастап, бас бәйгені жеңіп алды. Бұл – барша Қазақстан үшін үлкен табыс. Мен өнер ұжымының әрбір мүшесін және олардың көркемдік жетекшісі Ольга Ростовщикованы үлкен жеңісімен құттықтаймын. Бұл – сіздердің көп жылғы төккен ащы терлеріңіздің, талмаған еңбектеріңіздің, өнерге деген өшпес махаббаттарыңыздың жемісі. Еліміздің әрбір тұрғыны сіздермен мақтанады!»
Дүниежүзілік чемпионатқа ұжымды облыстық мәдениет басқармасының бастығы Досбол Әбдірайысов бастап барды. Ольга Ростовщикова жетекшілік ететін бұл ұжым биыл Мысырдағы осындай фестивальға қатысып, Хореография аталымы бойынша жеңімпаз болып оралған. Ұжым мүшелері – есту қабілеттері төмен жандар. Олар алғаш Петропавлдағы есту қабілеті төмен оқушылардың интернатында ұйымдасқан. Ұжым мүшелері мектеп бітірген соң жергілікті билік оларды таратпау үшін түрлі ұжымның жанына қосқан. Бірақ бәрі де ортақ қазаннан ақша бөлуге жарамай, ақыры С.Мұқанов атындағы қазақ сазды драма театрынан пана тапқан еді.
Біржан Жалғасбаев басқаратын дарқан пейілді ортада «Сезімтал» үлкен табыстарға да жетуде. Ал құлағы кеміс, сөйлей алмайтын жандарға би үйретудегі Ольга Ростовщикованың еңбегі айрықша. Ол өзінің шәкірттеріне бидің элементтерін ыммен көрсетіп, түсіндіріп отырады.
ПЕТРОПАВЛ
