70 ЖАСТАҒЫ МАРАФОНШЫ

Манарбек ақсақал Баянауыл мен облыс орталығы арасын жаяу жүгіріп өтті Ішкі істер органдарында 30 жыл­ға жуық қызмет атқарған ардагер, отставкадағы подполковник, “Нұр Отан” партиясының мүшесі Манар­бек Баженеев қазір Павлодар қала­сын­да тұрады. Қарттық жас сана­латын уақытына қарамастан әлі де қызметтен қолы босаған емес. Өмір бо­йы тыным таппай үйренген ақса­қал, кәрілік келді екен деп үйде тым-тырыс жатуды жөн көрмепті. Бұл күн­дері облыс орта­лығындағы “Қауіп­сіздік қызметі” деп аталатын ЖШС-нің күзет отрядын басқарады. Ішкі іс­тер органдарында қызмет атқарып жүр­ген жастарға үлкен өмір жолынан өт­кен аға полицейдің қастарында жүр­гені үлгі-өнеге. Олар­дың елін, жерін, тыныштықты қор­­ғауға деген батыл­дық­тары мен пат­риоттық сезімдері ара­ларында жүрген аға буын өкіл­дерінің ғибратынан үйреніп, жол табатыны да анық. – Биыл 21 мамырда мен 70 жасқа толамын. Еліміздің өркендеуі үшін қыз­мет жасап жатқан мына жастарға біз­дің қиындық пен қызыққа толы өт­кен өмір жолдарымыз үлгі болсын, жас­тар жігерлі, батыл, қайратты болып өс­сін, аталарына қарап сапқа тұр­сын деген оймен осы марафонды ұйым­дастырдық. Екіншіден, биыл Отан со­ғы­сындағы Жеңіске 65 жыл толып отыр. Ерлік жолдары ешқашан ұмы­тылмайды. Бізді жолға шығарған мақ­сат осы ерлікті дәріптеп, екі ауылдың арасын жол еткен бір жетілік марафон шарасын арнау, оларға бас ию, – дейді Манарбек ақсақал. Сөйтіп, жаяу марафоншы топ 14 мамыр күні, күндізгі он бірлер ша­масында Баянауыл ауданы, Жаңажол ауылы, Ескелді төбесінде орналасқан Мәшһүр Жүсіп кесенесінен шығып қа­ра жолға түсті. Марафоншы топ деге­німіз, ақсақалмен бірге студенттер мен жасөспірім балалар да ілесе бірге жүгіруге шығыпты. Жол оңай жол емес. Баянауылдың бірде еңіске, бірде биікке, бірде жазыққа шығатын бағы­тымен әуелі Майқайың ауылына, одан кейін Екібастұз қаласына жету керек. Кенші­лер қаласынан Манарбек ақса­қал бастаған марафоншылар тобы Қа­расор ауылы, Қалқаман кенті, Шека­ра­шылар ауылы, Ленин атындағы, яғни, бұрынғы Қазанғап бидің ауы­лынан өтіп 21 мамыр күні, Манарбек ақсақалдың туған күні күндізгі сағат 11-де облыс орталығына жетті. Сол жер­де Даңқ алаңына келіп, гүл шо­қ­та­рын қойды, жұртшылық мара­фон­шыларды қошеметтеп, құрметпен қарсы алды. Фарида БЫҚАЙ, ПАВЛОДАР. Суреттерді түсірген  В. БУГАЕВ.