Аталған резерваттың мамандары айтқандай, сол секілді қызыл кітапқа енген марал мен арқар да жиі кездесетін болыпты.
Ормандағы тіршілік иелерінің санын, сондай-ақ шоғырланған жері мен жүретін орындары туралы деректерді жинау мақсатында «Семей орманына» қарасты шаруашылықтарда жыл сайын жабайы жануарлардың есебі жүргізілетінін айта кеткен орынды.
«Үкіметтің 2006 жылы «Ерекше қорғалатын табиғи аумақтар туралы» заңын қабылдауына сәйкес аталған аумақтарда аң аулауға тыйым салынып, сақтық шараларының күшейтілуіне байланысты Семей өңірі бойынша бұлан, сібір елігі, қабан сияқты тұяқты аңдардың өсімінде оң динамика байқалып отыр. Бұған қоса Қызыл кітапқа кірген марал мен арқар да жиі кездесе бастағанын айта кету керек.
Кейінгі жылдардағы деректерді талдай келе түлкі мен сілеусіннің де саны көбейіп келе жатқаны анықталды. Ерекше қорғалатын табиғи аумақтарда қоян тәрізді аңның популяциясы салыстырмалы түрде тұрақты болған соң ақ қоян мен толайдың өскені байқалады. Алайда ор қоянның азайғанын айтып өтуіміз керек. Қасқыр, қарсақ және тиіннің саны да төмендеп келеді», делінген «Семей орманы» МОТР Семей филиалының орманды қорғау және күзету инженері Олжас Сейітқалиев.
Биыл сәуір-мамыр аралығында кешкі және таңғы уақыттарда арнайы дыбыс пен визуалды бақылау арқылы қауырсынды қараторғайлар мен қырғауылдарды есепке алу жүргізілді.
Жылдың басындағы жабайы аңдардың есептік деректерін талдаудың нәтижесінде резерваттың аңшылық шаруашылық мамандары борсық (+27 дарақ), құр құсы (+98 дарақ) мен сұр кекіліктің (+60 дарақ) көбейгенін анықтаған. Бірақ ақ кекіліктің (-8 дарақ) керісінше азайғаны байқалып отыр.
Ал Қызыл кітапқа енген қара ләйлектің популяциясы бұрынғы қалпында.
Мамандардың айтуынша, жабайы жануарларды есепке алу биотехникалық іс-шаралар көлемін жоспарлау үшін де қажет. Соған сәйкес бұтақты жем мен шөпті дайындау, сортаң жерлерді қалпына келтіру және жаңарту, бұландар мен еліктердің минералды балансын қалпына келтіру үшін тас тұзын қалау, суаттарды салу мен жаңалау, сол секілді аңдарды астық және тамыр дақылдары мен қосымша азықпен қамтамасыз ету амалдары қолға алынады.
«Семей орманына» қарасты 10 филиалдың орман күзетінің мемлекеттік инспекторлары аңшылық шаруашылық мамандарымен бірлесіп, бұл бағыттағы жұмысты үздіксіз жүргізіп келеді. Өйткені Ертіс өңіріндегі қарағайлы орман фаунасының алуандығы мен қолайлы қалыптасуы орындалатын биотехникалық іс-шаралардың сапасы мен уақтылығына байланысты.
Абай облысы
