Бородулиха Абай облысындағы ірі агроөнеркәсіптік аудандардың бірі саналады. Мұнда 70 ЖШС, 458 шаруа қожалығы жұмыс істеп келеді. Жалпы жер көлемі – 698 мың гектар, оның ішінде ауыл шаруашылығына арналған жер – 474,2 мың гектар. Атап айтсақ, егістік көлемі – 357,2 мың гектар, жайылымдық жер – 108,2 мың гектар және шабындыққа арналған жер – 7,8 гектар.
«Кәсіби бағдарға сәйкес ауданның ауыл шаруашылығында өсімдік бағытына басымдық берілген. Бірақ мал шаруашылығы да жол қойылған. Ауыл шаруашылығы жалпы өнімінің құрылымында өсімдік шаруашылығы – 60%, мал шаруашылығы 40%-ды құрайды.
Ауыл шаруашылығындағы жалпы өнімнің көлемі – 8 млрд 513 млн 500 мың теңгеге жетті (нақты көлем индексі 100,3%). Бұл облыстағы жалпы көлемнің 7,2%-ын құрайды.
Биылғы егістік көлемі 327 900 гектар (2021 жылмен салыстырғанда 8,1 мың гектарға көп), оның ішінде жаздық дақылдар 297 600 гектарға егілді», деді Бородулиха ауданының әкімі Ахметқали Нұрғожин.
Аудан аумағындағы негізгі өнеркәсіп орны Жезкент кентіндегі Орловка өндірістік кәсіпорны саналады. Қазір мұнда мердігер компаниялар қызметкерлерін қоса алғанда 3 мыңнан аса адам жұмыс істейді. Биылғы алты айда өндіріс көлемі 28 млрд 895 млн теңгеге жеткен. Өсу қарқыны – 112,4%.
Облыстың өзге аудандарындағы секілді Бородулихада да жол мәселесі өзекті.
«Буркутово ауылындағы кіреберіс жол – 23 шақырым. Сосновка мен Буркутовоны байланыстыратын жол 6 жыл бойы жөндеу көрмеген. Жолдың жартысы әбден тозған. Жүргізушілер айналма жолмен жүруге мәжбүр. Биыл тек шұңқырларды жөндеу жоспарланған. Бұл аталған мәселені түпкілікті шешпейді. Өйткені кепілдік мерзімі бір-ақ жыл. Біз жол жөндеу жұмыстарына бюджеттен қаражат бөлуді сұраймыз. Бұл – сметаға сәйкес 860 млн теңге», деді Таврия ауылдық округінің тұрғыны Наталья Старожилова.
Аудан әкімінің сөзіне сүйенсек, қазір аудандық маңызы бар 337 шақырым жолдың 250 шақырымы қанағаттанарлық жағдайда. Бұл – 74,1%.
«Аудандағы автомобиль жолдарының жалпы ұзындығы – 718 шақырым, оның ішінде 96 шақырымы – республикалық, 285 шақырымы – облыстық және 337 шақырымы – жергілікті маңызға ие жолдар.
Биыл жергілікті маңыздағы жолдарға орташа жөндеу жұмыстарын жүргізу жоспарланып отыр. Атап айтсақ, 144 млн 586 мың теңгеге (облыстық бюджеттің қаражат есебінен) ұзақтығы 2,8 шақырым болатын Жезкент өткізу пунктіне дейінгі кіреберістегі (РФ шекарасы) автомобиль жолын орташа жөндеу, жергілікті бюджеттен 22 млн 950 мың теңге сомасына ұзақтығы 19,4 шақырым болатын Буркотово ауылына дейінгі кіреберістегі автомобиль жолына ағымдағы жөндеу, сондай-ақ жергілікті бюджеттен 72 млн 200 мың теңге сомасына ұзындығы 3,5 шақырым Переменовка-Ремки бағытындағы жолға орташа жөндеу жүргізіледі.
«Ауыл – ел бесігі» жобасы аясында республикалық бюджеттен жалпы сомасы 396 млн 900 мың теңгеге елді мекендердегі көшелерді жөндеу жұмыстары жүргізіліп жатыр.
Аудандық ауруханаға жол жөндеу жобасы жарық шамдарын орнатумен бірге аяқталды.
Бородулиха, Петропавловка, Зенковка, Ивановка ауылдарында 23 шақырымға созылған қиыршық тас және асфальт төселген көшелерді жөндеу жұмыстары іске асырылып жатыр», деді А.Нұрғожин.
Облыс әкімі Нұрлан Ұранхаев Бородулихадағы жол проблемасы өңірдегі өзге де аудандарға тән мәселе екенін айтты. Өңір басшысы аталған мәселені жіті бақылауына алатынын жеткізді.
«Біріншіден, тікелей өзім барып қайтқан 6 ауданда осындай сипаттағы проблемалар бар екенін түсіну керек. Әлбетте, барлық жерге қыруар ақша қажет. Егер де жобалық-сметалық құжат дайын болса, бұл мәселені міндетті түрде қадағалаймыз. Биыл, өкінішке қарай, жөндеу жұмыстарының жүргізілуі екіталай. Бірақ келесі жылы бұл мәселемен міндетті түрде айналысамыз. Сондай-ақ халық айтып жатқан өңірдегі басқа да жолдар мен көпірлерді қарап шығу керек», деді Н.Ұранхаев.
Бұдан басқа аудан тұрғындары газдандыру, жарық және сумен қамтамасыз етуге байланысты мәселелердің қашан реттелетінін сұрады.
Абай облысы,
Бородулиха ауданы
