Мәскеуде өтетін әскери шеруге елімізден 5 ардагер қатысады

АСТАНА. 7 мамыр. Қазақстандық 5 ардагер 9 мамырда Мәскеуде болатын әскери шеруді тамашалап қайтады. Бұл туралы «Хабар» арнасы хабарлады. Жеңіс күнін Мәскеу төрінде атап өтетін бұл ардагерлердің екеуі астаналық, үшеуі алматылық. Биыл Ресейдің бас қаласындағы салтанатты шеруге соғыс ардагерлері ғана емес, тыл еңбеккерлері де қатыспақ. «Қызыл алаңда» өтетін салтанатты шеруді жыл сайын қарт сарбаздар асыға күтеді. Еліміздің ардагерлері осымен үшінші рет айтулы шараға шақырту алып отыр. Бұл атаулы күнді Мәскеуде қарсы алудың әсері ардагерлер үшін мүлде бөлек болары сөзсіз. Өйткені, олар «Қызыл алаңда» өздерінің қарулас, майданда бірге болған серіктерімен кездесіп, өткен шақтарын еске алысады. Мәскеуге құрметпен шақырылған ардагерлер тек әскери шеруді ғана емес, өзге де түрлі шараларға қатысады. Жолдыбай Базар. Дереккөз: «Хабар» арнасы. Фото: Yvision.kz.