Жаңа оқу жылы қарсаңында Керекуде күрделі жөндеу басталған 46 мектептің 11-інде бүгінде жұмыстар толық аяқталыпты. Қалған нысандар 1 қыркүйекке дейін дайын болады деп күтілуде. Алайда кейбір ғимараттардағы жұмыстардың сылбыр жүруінен тәуекелдер де аз емес.
– Биыл өңір мектептерінде 46 білім беру нысанына күрделі жөндеу жүргізілуде. Оның ішінде «Мектептерді жаңғырту» жобасы аясында – 33, өңірлік «Заманауи мектеп» жобасы бойынша – 4, «Ауыл – ел бесігі» бағдарламасы бойынша 9 нысан қамтылған. Бүгінде 11 мектепте жұмыстар толық аяқталды. Өзгелері бойынша күрделі жөндеуді оқу жылының басына дейін аяқтау жоспарланып отыр. Бір ғана Шарбақты ауданында 5 бірдей мектеп жаңаруда. Соның ішінде №1 мектепте жөндеу шараларының сылбыр жүргенін анықтадық. Мердігер соңғы күндері еңбек орындарының санын көбейтіп, жұмысты үдетті. Бұған қоса Ақсуға қарасты Сарышығанақ мектебі де 1 қыркүйекте балаларды қабылдай алмауы мүмкін. Дегенмен бұл жердегі мердігермен жасалған келісімшартта тапсыру мерзімі ұзағырақ екені көрсетілген. Жалпы, жөндеу жұмыстарын уақтылы аяқтау бойынша тәуекелдер бар екенін жасырмаймыз. Павлодар қаласындағы №5, 9, 22 мектептерде жөндеу қарқынды жалғасуда. Жауапты компаниялар үлгереміз деп уәде берді. Жоғарыда аталған білім ошақтарының қайсысы оқу жылының алғашқы күні оқушыларды қабылдауға үлгере алмай қалуы мүмкін екенін болжап айту қиын. Барлық жай-жапсары 25 тамыздан кейін анықталады, – деді облыстық білім беру басқармасының басшысы Самал Айтқазина.
Павлодар қаласындағы №9, 29 және №39 мектептердің әрқайсысы биыл 1-сыныпқа он сыныптан жинаған. Бала санының көптігіне байланысты білім ұялары оқушыларды үш ауысымда оқытады. Ал М.Әуезов атындағы және №16, 21 орта мектептерінің әрқайсысында сегізден 1-сынып бар.
Директорлыққа адам табылмай отыр
Бір қызығы, теріскейдегі мектептерде директорлар жетіспейді. Еліміздің оңтүстік өңірлерімен салыстырғанда біздің жақтың педагогтері мансапқа ұмтылуда тым сыпайылық танытуынан ба екен, әйтеуір директорлардың орнына жарияланатын кейбір конкурстарға мүлде үміткерлер тіркелмей қалатын жағдайлар жиі кездесуде. Мәселен, Павлодар ауданы бойынша екі бірдей орта оқу ұйымы басшысыз отыр. Оларға конкурс жарияланғанымен тілек танытқандар болмапты. Директорлардың тапшылығынан аудандағы Кемеңгер және Мичурин ауылдық мектептерін зейнет жасындағы адамдар басқаруда. Олар заң бойынша орнын босатуға тиіс. Алайда лауазымдық орын босағанымен директорлыққа келетін педагог табылмай қалуы мүмкін. Амалдың жоқтығынан білім беру басқармасы зейнеткерлердің мектеп басқаруына түсіністікпен қарауға мәжбүр болуда.
Биылғы оқу жылында өңір бойынша 360 мектеп жұмысын жалғастырады. Олардың 137-сі – мемлекеттік тілде, 170-і – аралас және 53-і орыс тілінде оқытады. 1 қыркүйекте облыс орталығының іргесіндегі Теміржолшылар кентінде 210 оқушыға лайықталған жаңа мектепті ашу жоспарлануда. Жаңа оқу жылында облыс бойынша оқушылар саны шамамен 114,8 мың болады деп күтілуде. Бұл өткен жылмен салыстырғанда 2 мың балаға көп екен. Ал 11 049 жеткіншек алғаш рет мектеп партасына отырады. Өкініштісі, 1-сыныпқа қабылданған оқушылардың ата-аналарының басым бөлігі орыс тілін таңдапты (57 пайызы).
Самал Оспанқызы орта мектептерде әлеуметтік қорғалмаған отбасылардан шыққан 13 117 оқушы бар екенін, жаңа жүйе бойынша олардың әрқайсысының есепшотына 19 тамыздан бастап Павлодар облысында бекітілген ең төменгі күнкөріс деңгейінен төмен емес мөлшерде, яғни 43 616 теңгеден ақшалай қаражат аударылып жатқанын да еске салды. «Мектепке жол» акциясы аясында қазірге дейін 4 мыңдай балаға жалпы сомасы 20 млн-нан астам теңгенің көмегі көрсетіліпті. Аймағымыздағы қалалар мен аудандарда 27 тамыз күні мектеп тауарларының ауқымды жәрмеңкесі ұйымдастырылады деп жоспарланған.
Павлодар облысы
