БҰҰ пәкістандықтарға гуманитарлық көмек көрсету жоспарын жариялады. БҰҰ Бас хатшысы Антониу Гутерриш халықаралық қауымдастыққа үндеу жариялап, 5,2 млн адамға азық-түлік, су, санитарлық және медициналық көмек көрсету үшін 160 млн доллар бөлуге шақырды.
«Пәкістан азап шегуде», деді БҰҰ Бас хатшысы Антониу Гутерриш бейнеүндеуінде. Ол ел тұрғындары бұрын-соңды болмаған жаңбыр мен су тасқынынан зардап шегіп жатқанын атап өтті.
Пәкістан билігінің есебі бойынша, табиғи апаттан 33 миллион адам зардап шеккен. Бұл – ел тұрғындарының 15 пайызы. 50 мыңнан астам адам елдің солтүстік-батысына көшірілді.
Табиғи апаттарды басқару ұлттық агенттігінің басшысы Ахтар Наваз Пәкістандағы 160 ауданның 72-сі табиғи апаттан зардап шеккенін айтты. 800 мың гектардан астам ауыл шаруашылығы алқаптары су астында қалды.
