Бұған дейін «темір атымен» талай белесті бағындырған Ернат Мелсұлы осы жолғы велошеруін Ахмет атамыз туған топырақтан бастап, Әзербайжан мен Грузияны басып, сапарын Түркияның Ыстанбұл қаласындағы атақты таэквондошы Мұстафа Өзтүріктің зиратына тәу етуімен түйіндемек.
«Велошеруге жалғыз шығып барамын. 55 күнде 5555 шақырымды еңсерсем деп ойлаймын. Бұл сапарымда ұлт ұстазын ұлықтаумен бірге еліміздің Әзербайжан, Грузия, Түркиямен арада дипломатиялық қарым-қатынастың орнағанына 30 жыл толуын насихаттап, өз үлесімді қоссам деймін. Сондай-ақ Баку, Тбилиси, Анкара, Ыстанбұлдағы Абай атамыз атындағы көшелерді көзбен көріп, сондағы ақын ескерткішіне тағзым етуді жоспарлап отырмын», деді велошабандоз.
Айта кетейік, биылғы жыл басында Ернат Мелсұлы ұлт ұстазының айтулы мерейтойына арнап «150 жылдыққа – 150 шақырым» атты қысқы веломарофон өткізіп, елордадағы Триатлон паркінде елу айналым жасап, 150 шақырымды еңсерген еді. Ол еліміздегі алғашқы қысқы марофон ретінде Қазақстанның рекордтар кітабына тіркелді.
