ЖАСТАР ЖАРҚЫРАЙ КӨРІНГЕН ТУРНИР

Ақтөбе қаласындағы “Қоныс” спорт сарайы төрт күн бойы бокс спектаклінің аренасына ай­нал­ды.  Себебі, мұнда Олимпия ойындарының күміс жүлдегері, Әлем кубогының екі дүркін иегері, екі мәрте Еуропа чемпионы, КСРО-ға еңбек сіңірген спорт шебері Серік Қо­нақ­баев­тың жүлдесі үшін бокстан XVІІІ ха­лық­аралық тур­нир өтті. Қазақстан, Ресей, АҚШ, Тәжікстан, Армения, Түркіменстан, Өзбекстан, Украинадан, сондай-ақ еліміздің барлық облыстарынан 140-қа жуық былғары қолғап шебері арасында өткен тартысты кездесулерде оза шыққан 11 салмақтағы 22 боксшы финалға жолдама алды. Былғары қолғап ше­берлерінің ақтық сындарын тамашалауға жан­күйерлер көп жиналды. Финалдық кездесулер шымылдығын ашқан 48 килограмм салмақ дәрежесіндегі ақтөбелік Ақниет Бекжанов пен ақмолалық Теміртас Жүсіпов ара­сын­дағы жекпе-жек тартысты өтті. Өзінің қар­сы­ласынан тәжірибелілеу Теміртас Жүсіпов 3:2 есе­бімен жеңіске жетті. Спорт шеберлігінен үміткер он сегіз жасар Қайрат Төребекұлы жерлесінің есе­сін қайтарып, 51 килограмда астаналық Азат Мах­метовтен басым түсті. 54 килограмм салмақ дәре­жесінде Астана қаласының боксшысы, спорт шебері Данияр Тоқбаевты еліміздің құрама ко­ман­дасының мүшесі Темірбек Диханбаев бір ұпай айыр­ма­шы­лығымен ұтты. 57 килограмм салмақ дә­ре­же­сінде ақтөбелік Мәди Шолақов жер­лес­терінің ме­рейін үстем етіп, Ақмола обл­ы­сы­ның бокс­шысы Жандос Момыновты 4:1 есебімен жеңді. 60 килограмм салмақта сынға түскен Қазақстан құрама командасының мүшесі Айдар Өмірзақов пен ақтөбелік Берік Абдрахманов арасындағы кез­де­судің тартысты өткені сондай, соңғы сәттерге дейін жеңіс тізгінін кім ұстайтыны белгісіз болды. Бұл жолы қарсыласына бір соққы артық дарытқан А.Өмірзақов басымдық танытты. 64 килограмм сал­мақта өнер көрсеткен семейлік боксшы А.Қасымов қар­сыласының жарақат алып қалуына байланысты бәйгені шаппай алды. 69 килограмм салмақ дәрежесінде сынға түскен ресейлік Мұқаметқали Мұсаев пен АҚШ-тың былғары қолғап шебері Джери Фиорентино әдемі бокс көрсетті. Өз елінің биылғы біріншілігінде жүлдегерлер қатарынан көрінген ресейлік боксшы осал қарсылас болмай шықты. Ол Д.Фиорентинаның қанша қарсы­лас­қанына қарамастан, үздіксіз шабуылдап, жеңіске жетті. 75 килограмм салмақ дәрежесінде ақтөбелік Рафаил Аббасов еліміз құрама командасының мү­­шесі Нұрдәулет Жармановпен кездесті. Н.Жар­ма­нов елі­міз­дің құрама командасына бе­керден-бекер қабыл­дан­бағанын айқын дә­лел­деді, 15:4 есебімен жеңіп, қар­сыласынан көш ілгері екенін байқатты. 81 килограмм салмақта Тәжікстан құрама коман­д­а­­сының үкілеп қосқан үміткері Делебержан Абдурахманов Ақмола об­лысының боксшысы Мәди Қабиевтің шеберлігін мо­йындауына тура келді. Ал, 91 килограмм салмақта ал­матылық Нұржан Бекзатов пен Павлодар боксының тү­л­егі Сергей Гончаров қолғап түйістірді. Бұл кездесу ұпай санымен тең аяқталғанымен, Н. Бекзатовтың сәл белсенділік көрсетуі таразы басын өзіне аударып әкетті. Ол турнир жеңімпазы атанды. Турнирдің ашқан жаңа есімі – ол 91 ки­ло­грам­нан жоғары салмақта сынға түскен атыраулық Рахман Әлжанов болды десек, артық айтқандық емес. Ширек финалда белгілі былғары қолғап шебері Руслан Іргебаевтың жолын кескен он сегіз жасар боксшының рингті сезінуі көрермендер көңілінен шықты. Қазақстан құрама командасының мүшесі, он тоғыз жастағы Айдар Өмірзақов Серік Қонақ­баев­тың жүлдесі үшін өткен ХVІІІ халықаралық турнирдің ең үздік боксшысы атанды. Турнирде бірінші орын алған боксшыға 4 мың, екінші орынға 3 мың және үшінші орын алғандардың әр­қайсысына 1,5 мың АҚШ доллары көлемінде ақшалай сыйлық ұсынылды. Бұл жастар жарқырай көрінген жарыс болды. Шеберлігін әлем мойындаған атақты былғары қолғап шебері, Парламент Мәжілісінің депутаты Серік Қонақбаев турнирдің ұйымдастырылуына жоғары баға берді. Сонымен, төрт күн бойы жанкүйерлер көңілін күпті еткен жарыс мәресіне жетті. Ақтөбеліктер елімізде тәп-тәуір жас боксшылар өсіп келе жатқанын көрді. Сатыбалды СӘУІРБАЙ, АҚТӨБЕ.