Отандық фильм Канн кинофестивалінде бақ сынайды

АСТАНА. 15 мамыр. Режиссер Әділхан Ержановтың «Үкілі кәмшат» фильмі Канн кинофестиваліне қатысады. Бұл туралы Today.kz хабарлады. Әділхан Ержановтың айтуынша, «Үкілі кәмшат» 2013 жылдың жазында Алматы облысында түсірілген. Режиссер: «Канн кинофестиваліне үміткерлердің есімі 17 сәуірде анықталған. Бірақ, ай соңында додадан тыс фильмдердің тізімі де белгілі болды. Соның ішінде мен түсірген туындының болғаны қуантады», – деді. Жанр бойынша, бұл фильм драмаға жатқызылады. Бірақ кино сыншылары оған «қара комедия» деп айдар тағыпты. Осымен 67-рет ұйымдастырылып отырған кинофестиваль бүгіннен бастап 25 мамырға дейін жалғасады. Байқауда 18 фильм бақ сынайды. Кинофорумның шымылдығы «Монаколық Грейс» туындысымен түрілмек. Тағы бір қуанарлық жәйт, тағы бір отандасымыз Марғұлан Қапашевтің «Еркін құстар» қысқаметражды фильмі Short Film Corner бағдарламасы аясында көрсетіледі деп күтілуде. Канн кинофестиваліне бұған дейін қазақстандық екі кинорежиссердің туындысы қатыстырылған. Олардың бірі  – Д.Өмірбаевтың «Киллер» фильмі (1998 ж.) болса, екіншісі – Н.Түребаевтың қысқа метражды «Антиромантика» атты (2001ж.) туындысы. Бұл екеуінің ішінде «Киллер»  «ерекше көзқарас» жүлдесін иеленген. Жолдыбай Базар. Дереккөз: Today.kz. Фото: сsoyachts.com.