«Ақтоғай-Агро» ЖШС-ның негізінде ашылған жаңа кәсіпорында жылына 10 мың литр сүт сауылады. Серіктестіктің бас директоры Александр Терентьев қазіргі таңда мұнда Словакиядан сүт және ет бағытындағы симментал тұқымды 93 ірі қара жеткізілгенін айтып өтті. Жыл соңына дейін тағы мыңнан аса сиыр әкелу жоспарланып отыр.
Әлеуетті ферманың ашылуына қатысқан Ауыл шаруашылығы министрі Ербол Қарашөкеев пен облыс әкімі Әбілқайыр Сқақов жобаның маңыздылығын атап, ұжымға табыс тіледі.
Жалпы, өңірдегі 36 тауарлы сүт фермасының үштен бірі соңғы екі жарым жыл ішінде іске қосылған. Соның арқасында қосымша 38 мың тонна сүт өндіріледі. Бұл жобаларға 43 млрд теңге инвестиция бөлініп, ауылдық жерлерде 500-ден астам жаңа тұрақты жұмыс орындары ашылды. Алдағы уақытта тағы осындай 8 ферма пайдалануға беріледі деп күтілуде. Мұның барлығы өңірдегі суармалы алқаптарды ұлғайтудың нәтижесі. Шаруашылықтар суармалы танаптар арқылы құнарлы мал азығын жеткілікті дайындауға көшті.
Ақтоғайда пайда болған жаңа кәсіпорынның құрылысына 6 млрд теңгеден астам инвестиция құйылған. Фермада қазіргі күні 90 адам жұмыс істейді. Суармалы алқапты дамыту жұмыстарын жүйелі жүргізетін «Ақтоғай-Агро» ЖШС былтыр картоптың 9 түрін және жүгерінің жаңа сұрыптарын өсіруді қолға алған. Мұнда малға арналған жемшөп базасын құру мақсатында жүгерінің гибридті түрлері де өсіріледі.
Ертіс-Баян өңірінің агроөнеркәсіп кешенінде 2025 жылдың соңына дейін 100-ден астам инвестициялық жобаны өміршең ету жоспарланған. Оған 180 млрд теңге инвестиция құйылмақ.
Павлодар облысы,
Ақтоғай ауданы
