Астана қаласының полиция департаменті көші-қон қызметі басқармасының басшысы Арман Баймұхамбеттің мәліметінше, жыл басынан бері елордада 29 мыңнан аса шетел азаматы тіркелген.
– Оның 4 мыңы – Ресей азаматы. Осы уақытқа дейін көші-қон заңнамасын бұзғаны үшін 5 мыңнан аса шетел азаматы жауапкершілікке тартылып, 867 адам елден шығарылды. Шетелдіктерді шақырып, олардың елде болу талаптарына немқұрайды қараған, яғни тиісті ережелерді сақтамаған 1083 адам әкімшілік жауапкершілікке тартылды. Шетелдік азаматтарды жұмысқа тартып, жұмысқа пайдалану ережелерін бұзғаны үшін 93 жұмыс беруші анықталды. Тіркеу және құжаттандыру ережелерін бұзғаны үшін 2 866 азамат әкімшілік жауапкершілікке тартылды. Шетел азаматтарының ел шекарасына енуі туралы ақпарат міндетті түрде құқық қорғау органдарына хабарлануға тиіс, – деді А.Баймұхамбет.
«Азаматтарға арналған үкімет» мемлекеттік корпорациясы КеАҚ Астана қаласы бойынша филиалы директорының орынбасары Динара Қуанышеваның айтуынша, шетел азаматтары тарапынан өтініштің көп түсуіне байланысты Сауран көшесі, 7 мекенжайы, «Нұрлы жол» вокзалының ғимаратында көші-қон қызметін ұсынатын қосымша секторлар іске қосылған.
Қалалық жұмыспен қамту және әлеуметтік қорғау басқармасының басшысы Илья Скубтың мәлімдеуінше, босқын мәртебесін алу үшін 96 адам өтініш білдірген. Оның екеуі – Ресей азаматы. Өтінішті қарастыру 3 айға созылады. «Бүгінде порталда 6 мыңнан астам бос жұмыс орны бар. Әзірге жұмыс сұраған Ресей азамтары жоқ», дейді И.Скуб.
