Қазақстан • 03 Қазан, 2022

Күзгі науқан аяқталып қалды

78 рет көрсетілді

Өңір диқандары 4 млн 700 мың тоннадан астам астық бастырып алды. Биыл жауын-шашынның аз түскеніне қарамастан, жер ырысы мол болып, бидай бітік шықты. Жалпы өнім көлемі былтырғы көрсеткіштен 1,7 млн тоннаға артық. Астықтың шығымдылығы гектарына 12 центнерге жуықтайды. Жекелеген алқаптарда бұл көрсеткіш гектарына 18-20 центнерге дейін жетеді.

Облыстық ауыл шаруа­шы­лығы жә­не жер қатынастары басқармасының мә­лі­метінше, бүгінге дейін алқаптағы ас­тық­тың 99,2 пайызы орылған. Шаруа­шылықтардың дені жер ырыз­дығын ысырапсыз жинап алып, комбайндарын қаңтарып қойды. Ал Жітіқара, Қамысты, Қарабалық, Қостанай, Мең­діқара, Сарыкөл, Ұзынкөл аудандарында соңғы қалған 2-3 мың гектар астықты жинап алу жұмыстары аяқталайын деп қалды.

Қостанай ауданына қарас­ты Майкөл ауылындағы шаруа­шы­лық биыл көк­темде 3,5 мың гектар жерге дән сіңіріпті. Егіннің шы­ғымы жаман емес. Гектарына 12-13 цент­нерден келіп тұр. Бұл ала жаздайғы диқан­дардың тынымсыз еңбегінің нәтижесі екені сөзсіз. Шаруашылықта қазір соңғы қалған 300 гектардай жердің астығын төрт комбайн тоқтаусыз орып жатыр.

– Биылғы жаз жаңбырсыз болды деуге болады. Бір-ақ рет дұрыстап тұрып жауды. Одан кейін күн ыстық, ылғал өте тап­шы болды. Алайда агротехнология талаптарын сақтаудың нәти­жесінде мол өнімге қол жет­­кіздік. Сапалы тұқым, оны уақытында себу, топы­рақты химиялық өңдеуден өткізу, ты­ңайту, зиянкестерге қарсы күрес, осының бәрі өз нәтижесін берді. Енді 300-дей гектар қал­ды. Соңғы аптада күн райы бұ­зылып, жұ­мыс тоқтаңқырап қа­лып еді, ауа райы ашыла салып қай­та шықтық. Ауа райы кедергі болмаса, алқап­тағы жұмысты алдағы бір-екі күннің ішінде аяқтауды жоспарлап отырмыз. Бидайдың сапасы да өте жақсы – 3-сұрып. Өнімнің қамырлылығы да жоғары: отыз бестен басталып, қырыққа дейін барады, – дейді шаруашылық басшысы Тимофей Снигирев.

Облыстық ауыл шаруашылығы басқар­масының бас маманы Кен­же Жұман­дықовтың айтуынша, облыстағы астық қой­маларына 8,3 млн тоннаға дейін өнім сыя­ды. Биыл алынған өнімнің бәрі астық қабыл­дау пунктері мен ауылшаруашылық тауарларын өндірушілердің қоймаларында сақталады.

– Күзгі астық жинау жұмыс­тарына фор­вардық сатып алу бағдарламасы бойынша «Азық-түлік келісімшарт корпорация­сы» ар­қылы 36,1 млрд теңге бө­лінген. Енді бұл қаржыны ди­қандар көлемі 493 мың тонна астық тү­рінде қайтаруға тиіс. Биыл ас­тық жинау науқаны ойдағыдай өтті. Жаңбырға байланысты бір-екі күн тоқтап қалғаны болмаса, айтарлықтай қиындықтар болған жоқ. Ауылшаруашылық дақылдары бірыңғай піскен жоқ. Өйткені биыл жауын-шашын әр жер­де әрқалай болды. Сондықтан бір жерде гектарына 5 центнер берсе, екінші жерде 20 центнерге дейін өнім берген жағдайлар болды. Жалпы, былтырғы қуаңшы­лықпен салыстырғанда, биылғы астық әлдеқайда жақсы. Жиналған бидайдың 95 пайызы үшінші класқа жатады. Бұл биылғы өнім­нің шығымы ғана емес, сапасы да өте жоғары екенін көрсе­теді, – деді Кенже Жұмандықов.

Күн райы жақсы болса, облыс егін нау­қанын осы аптада аяқтап қалуы мүмкін. Ал майлы да­қылдардың кейбір түрі кешірек піседі. Биыл өңірде 748 мың 300 гектар ал­қапқа майлы дақыл тұқымы себілген. Қазір ди­қандар 403 мың 566 гектардан 220 мың 600 тонна өнім жинап алды.

 

Қостанай облысы

Соңғы жаңалықтар

Конституциялық мәртебе берілді

Қазақстан • Бүгін, 01:05

Блогер журналист емес!

Қоғам • Бүгін, 00:52

Сот жүйесін жетілдіру

Саясат • Бүгін, 00:06

Мақташылардың мұңы

Экономика • Кеше

Уақыт талабы

Қоғам • Кеше

Күрескер Гейне

Әдебиет • Кеше

Ажалды жеңген Аспан

Әдебиет • Кеше

Ағаш көшеті егілді

Аймақтар • Кеше

Ұқсас жаңалықтар