Қала қолөнершілерінің туындылары жаһандық деңгейде мойындалуына орай Таразда «Тараз – қолөнершілер қаласы» атты халықаралық көрме ұйымдастырылды. «Көне Тараз» этномәдени кешенінде өткізілген халықаралық көрмеде әрісі Нидерланд, Үндістан, Түркия, берісі Өзбекстан, Тәжікстан, Ресей, Қырғыз Республикасынан келген қолөнер шеберлері өздерінің үздік бұйымдарын ұсынып, жергілікті жұртшылықтың қызығушылығын тудырды. Іс-шараға келген тараздықтар алыс-шақын шет мемлекеттерден келген мәртебелі меймандардың бұйымдарын тамашалап қана қоймай, сатып алып та жатты. Бұл шын өнерге көрсетілген құрмет еді.
«Тараз 2000 жылдан астам тарихы бар байырғы шаһар екені баршаға мәлім. Тарихының тамыры мыңжылдықтармен астасқан көне қала бүгінде уақыт ағымына сай тотыдай түрленіп, өркениет көшіне ілесіп келеді. Біз өздеріңізбен осындай мерейлі сәтте қауышқанымызға бек қуаныштымыз. Облыс орталығының дүниежүзілік қолөнершілер қаласы тізіміне енуі – біз үшін зор мәртебе. Барлықтарыңызға абырой, табыс тілеймін», деді өңір басшысы Нұржан Нұржігітов іс-шараға келген мәртебелі меймандармен кездесу барысында.
Жаһандық деңгейде танылған шеберлердің бұйымдары мен сәндік орамалдары, басқа да тамаша туындылары кімді де болсын қызықтырмай қоймасы анық. Айталық, қызғалдақтар елі атанып кеткен Нидерландтан келген қолөнер шеберлері ұсынған ерлер және әйелдер сөмкесі 130 мың теңгеге саудаланса, түркістандық Дәурен Міншариповтің жасаған қобызының құны 450 мың теңге екен. Ал көрмеге қойылған тауарлардың ең қымбатының құны 650 мың теңгеге дейін жетеді. Әлбетте, мұнда қойылған шағын бұйымдардың бірқатарының бағасы қолжетімді екенін де айта кеткен жөн.
Сәнді бұйымдарға қызыға қараған кейбір азаматтар қымбат заттарды ойланбай сатып алып жатты. Бұл, бәлкім, қолөнер шеберлері еңбегінің халық тарапынан бағаланғаны шығар. Керек деректерге зер салсақ, дүниежүзілік қолөнершілер кеңесі 1964 жылы Бельгия елінде ресми түрде тіркелген көрінеді. 60 жылға жетеғабыл уақытта халықаралық ұйым әлемнің 59 қаласын қолөнершілер шаһары ретінде мойындаса, Тараз қаласы бұл тізімге алпысыншы болып еніп отырған жайы бар.
«Таразымызды енді әлем білетін Әулиеата десек те болады. Жаһандық кеңестің көне қаламызды тізімге қосуы – біз үшін зор мақтаныш. Көршілес Өзбекстан елінен төрт, Қырғыз Республикасынан бір қала кеңес құрамына енсе, Қазақстан тарапынан кие дарып, құт қонған Тараздың сол қатарға қосылғаны қуантады», дейді көрме туралы пікірімен бөліскен облыс әкімінің орынбасары Қанатбек Мәдібек.
Іс-шараға арнайы ат басын бұрған Мәдениет және спорт министрлігі Туризм және индустрия комитетінің төрағасы Дастан Рыспеков Тараздың дүниежүзілік кеңес тарапынан мойындалуын ел үшін толайым табыс деп есептейді. «Көне Таразды дүниежүзілік қолөнер шеберлері қаласы атануымен құттықтаймын. Түсіне білгенге бұл толайым табыс, зор жетістік. Енді тараздық қолөнер шеберлері халықаралық деңгейдегі майталман мамандармен тәжірибе алмасу мүмкіндігіне ие болады. Сол тұрғыдан алып қарағанда бұл еліміз үшін де зор мақтаныш», дейді ол.
ТАРАЗ
