Биыл жергілікті бюджет есебінен жаңа модификациялық кабинеттер сатып алуға 1 063,3 млрд теңге қаражат бөлініп, жыл соңына дейін 102 пән кабинеті толықтай жабдықталады. Жалпы, Алматы облысы – тұрғындар тығыз орналасқан өңір. Мұндағы демографиялық өсім мен ішкі миграцияға байланысты жыл сайын оқушылар саны артып келеді. Сондықтан да өңірде үш ауысымды мектеп санын азайту әлі күнге күн тәртібінен түскен емес. Бүгінде 54 білім ұясының үш ауысымда жұмыс істеп тұрғаны тағы рас. Яғни облыстағы мектептерде 23 273 оқушы орны тапшылығы бар. Бүгінде үш ауысымда білім беру мен оқушы орындарының тапшылығын жою мақсатында 2022-2025 жылдар аралығында 62 мектептің құрылысын салу жоспарланған. Биылдың өзінде 20 білім беру нысанының құрылысы жүргізіліп жатыр.
– Соңғы үш жылда педагогтердің жалақысы 75 пайызға көтерілді, келер жылдың қаңтарында тағы 25 пайызға артады. Бесінші жыл қатарынан жаңа форматта біліктілік деңгейін растаған педагогтердің жалақысы 30-50 пайызға артты. Қазір облыстағы 31 193 ұстаздың 9 331-і модератор, сарапшы, зерттеуші, шебер санатында. Магистр-педагогтерге 10 АЕК көлемінде қосымша ақы төленеді, – деді облыс ұстаздарын құттықтаған жиында облыс басшысы Марат Сұлтанғазиев.
Өңір педагогтерінің салтанатты басқосуында Алматы облысының «Үздік ұстазы» анықталды. Бұл құрметті атаққа биыл Іле ауданындағы №40 мектебінің физика пәнінің мұғалімі Балауса Саримова лайық деп танылды. Мақтаулы мұғалімге Марат Сұлтанғазиев жеңіл көліктің кілтін тапсырды. Сонымен қатар облыс әкімі білім беру жүйесін дамытуға, рухани, адамгершілік тәлім-тәрбие беруге үлес қосқан бірқатар ұстазды Алғысхатпен, құрмет грамотасымен марапаттады.
Алматы облысы
