Қызылорда облысында жер астынан жәдігер теңгелер табылды

АСТАНА. 21 мамыр. Қызылорда облысы Шиелі ауданы Бидайкөл ауылының тұрғыны Жасұлан Омаров деген азамат Ыбырай Жақаев атындағы күріш өсіру тарихы мұражайына 1905-1916 жылдары шығарылған заемдар мен рубльдерді тапсырды. Бұл туралы zakon.kz хабарлады. Жасұлан Омаров 2006 жылы өз ауласына жеміс ағаштары мен түрлі дақылдар екпекші болады. Содан ол арық қазуға кіріседі. Бір кезде ол қазылған жерден бір қаңылтыр қорапша тауып алады. Оны ашып көрсе, ішінен целлофанға оралған көп ақша шығады. Бұған соншалықты мән бере қоймаған ол әлгі қорапшаға жәдігер теңгелерді қайта салып, үйіне апарып қоя салады. Осылайша арада бірнеше жылдар өтеді. Кенет Ж.Омаровтың есіне осыдан 8 жыл бұрын тауып алған қорапша түседі де, оны мұражайға табыстайды. Осыған байланысты Ыбырай Жақаев атындағы күріш өсіру тарихы мұражайының директоры Құттықыз Ыханова: «Бұл өткеннен қалған бір естелік, көп кездесе қоймайтын жәдігер. Алдағы уақытта мұражайымызда ақшалар жайлы үлкен көрме ұйымдастырылмақ және мектептерде көшпелі көрмелер өткізілмек. Аталған шараларда аудан тұрғындары аталарымыздың көзі көріп, қолмен ұстаған ақшаларын тамашалай алады», – деді. Жолдыбай Базар. Дереккөз: zakon.kz. Фото: zakon.kz.