Мәдени шараның мақсаты – халық арасында кітап оқу мәдениетін қалыптастырып, жас ұрпақтың рухани қазынасын молайтып, қазіргі ақын-жазушылардың жаңа шығармаларын насихаттауды көздеген.
Бұл күні кітапхана есігі қала тұрғындары мен оқырмандарына айқара ашылып, түннің бір уағына дейін қызмет көрсетті. Іс-шараның мазмұнды өтуіне еліміздегі Үндістан, Түркия, Польша, Армения елшіліктері де белсенді атсалысып, олар кітап көрмесін ұйымдастырып, концерттік бағдарлама ұсынды. Елордадағы «Орыс үйінің» жетекшісі Ольга Филонова «Астана – бейбітшілік бесігі» атты ашық диктантқа қатысқан кітапхана оқырмандарын марапаттап, аталған кітапханалар жүйесіне жаңа кітаптарды сыйға тартты.
Сондай-ақ іс-шара аясында Толымбек Әбдірайым мен Серікбол Хасан секілді балалар жазушыларымен кездесу ұйымдастырылып, олар балаларға өз шығармашылықтары мен кейінгі шыққан кітаптары туралы айтып берді. Ал «Қарашаңырақ» ұлттық тәрбие беру мектебінің жетекшісі Тұрар Саттарқызы жас оқырмандар мен қонақтарға ұлттық тәрбие туралы тағылымды ой толғаса, «Менің қалауымдағы кітаптар» атты BookDating алаңының спикерлері тележүргізуші Әйгерім Есенәлі, тарихшы Жақсылық Сәбитов және журналист Руслан Ыдырысов өздерінің өмір жолына ерекше әсер еткен үш кітап жайында әңгімеледі. «Авангард» поэзия клубының жетекшісі, ақын Дина Ораз өлең жазуға құмартқан балаларға шеберлік сабағын өткізсе, құммен сурет салу үйірмесінің жетекшісі Айжан Жәркешқызы осы өнердің қыр-сырын үйретті.
Сонымен қатар Еркеғали Рахмадиев атындағы Мемлекеттік академиялық филармониясы мен «Наз» мемлекеттік би театрының өнерпаздары мәдени кештің көрігін қыздырса, елордалық Қуыршақ театрының әртістері балаларға қызықты ойындар ойнатып, тәтті сыйлықтар тарту етті. «Замандас 21» қоғамдық қоры мүшелері ұлттық нақышта жасаған қол өнер бұйымдары жәрмеңкесін ұйымдастырды.
Бір сөзбен айтқанда, «Ай сәулесімен кітап оқиық» атты кітапхана түніне арналған іс-шара оқырмандарға жылы әсер қалдырды.
