Қазақстандық тәжірибе Арменияны да қызықтырады

Кеше Қазақстан Республикасы Мемлекеттік қызмет істері агенттігінің төрағасы Әлихан Байменов Армения Республикасы Азаматтық қызмет кеңесінің төрағасы Манвел Бадалянмен кездесті. Кездесуде тараптар Қазақстан мен Армения арасындағы екіжақты ынты­мақтастық мәселелерін талқылады. Қоры­тындысында Қазақстан Респуб­ликасының Мемлекеттік қызмет істері агенттігі мен Армения Республикасының Азаматтық қызмет кеңесі арасындағы мемлекеттік қызмет саласында Өзара түсіністік туралы меморандумға қол қойылды. Бұл құжат екі ел сарапшыларының кездесулер өткізіп, пікірлер алмасу­ларына, мемлекеттік қызмет мәселелері жөніндегі іс-шараларға қатысуларына, сондай-ақ, Қазақстан мен Армения мемлекеттік қызметшілерінің тағылым­да­мадан өтулеріне бағытталған. Манвел Бадалян журналистерге берген сұхбатында Қазақстанның мем­­лекеттік қызмет саласын рефор­малау­дағы тәжірибесіне, оның ішінде «А» корпусының енгізілуіне үлкен қызығушылық танытатынын атап өтті. «Қазақстан Республикасы мен Армения Республикасының мемлекеттік қызмет саласындағы ынтымақтастығының перспективасы ерекше зор болмақ, – деді ол. – Біз Қазақстанның мемлекеттік қызмет туралы заңнамаларымен жан-жақты таныстық. Қол қойылған меморандум екі елдің осы саладағы ынтымақтастығын дамытуға ықпал етеді деген сенімдемін». Ал Әлихан Байменов: «Қазақстан мемлекеттік қызметті реформалауда ТМД-да көшбасшы болып табылады. Кез келген мемлекеттің өзгеден үйренетін жақсы жақтары болады. Біз де әлемдегі мемлекеттермен тиімді қатынастар жасауға тиіспіз. Кездесуде Астанадағы аймақтық хабтың аясында бірлесе іс-қимыл жасауға уағдаластық. Осы жылдың соңында немесе келесі жылдың басында хабтың бір шарасы Ереван қаласында өтетін болады», – деді. Әлисұлтан ҚҰЛАНБАЙ, «Егемен Қазақстан».