Қазақстанда қайырымдылық жасау мен оны дамытуға елеулі үлес қосқан қайырымдылық жасаушыларды ескерусіз қалдырмау және ынталандыру, оларға қоғамның назарын аудару мақсатында Ақпарат және қоғамдық даму министрлігі 2018 жылдан «Жомарт жүрек» сыйлығын табыстап келеді. Бұл ретте биылғы конкурсқа 17 облыс пен республикалық маңызы бар қалалардың өкілдері қатысты. Конкурс жеңімпаздары – онлайн-дауыс беру қорытындысы бойынша халық таңдаған 50 адам «Жыл тұлғасы», «Жыл меценаты», «Туған өлке», «Жылдың үздік ұйымы» және «Жылдың үздік қамқоршысы» деп аталатын 5 номинация бойынша анықталды.
Марапаттау рәсіміне Парламент Мәжілісінің депутаттары, бизнес саласының, қайырымдылық және еріктілер ұйымдарының өкілдері қатысты. Алқалы жиында Ақпарат және қоғамдық даму министрі Дархан Қыдырәлінің байқау жеңімпаздарына арнаған ақжарма лебізін аталған сала вице-министрі Д.Қадыров жеткізді.
«Жомарт жүрек» сыйлығының 50 жеңімпазының әрқайсысы өз ауылын, қаласын дамытуға зор үлес қосып, мұқтаж жандарға көмектескен. Атап айтсақ, «Жыл тұлғасы» номинациясы бойынша қайырымдылық қызметі үшін марапатқа ие болғандардың арасында ауыл мектептері мен балабақшаларға демеушілік көмек көрсетіп жүрген Қызылорда облысының «Ер-Әли» шаруа қожалығының басшысы Әліби Бекжанов бар. Оның демеушілігімен А.Оңалбаев атындағы №117 орта мектебінің спорт залы мен ауылдық мәдениет үйінде 220 орындық көрермендер залы ашылған. Мақпалкөл ауылында демеушілікпен аз қамтылған отбасыларға арналған 4 үй салынды.
Ал «Жыл меценаты» номинациясы бойынша Түркістан облысының атынан қатысқан «Күлтөбе» ЖШС директоры Шәріпбек Саурықов Ақтас ауылы мен Бәйдібек ауданы Шыбыт елді мекенінің мұқтаж отбасыларына тұрғын үй салуға қаражат бөлген. Шаян ауылдық округіндегі Шаян ауылының мүмкіндігі шектеулі отбасылары мен мұқтаж тұрғындарына тұрғын үй салуға қаражат бөлумен қатар, осы ауылдың аз қамтылған отбасыларына тұрақты түрде азық-түлік және қаржылық көмек көрсетіп тұрады.
Туған жерді қолдау бойынша әлеуметтік маңызды жобаларды жүзеге асырғаны үшін «Туған өлке» номинациясымен марапатталғандардың ішінде Ақтөбе облысының «Динар-Электромаш» ЖШС директоры Сергей Вишняк бар. Ол мәдениет, білім және спорт мекемелеріне тұрақты көмек көрсетіп келеді. Ақжар кентінде инфрақұрылымды ұйымдастыруға және Жаңақоныс кентінде көгалдандыру үшін демеушілік көмек көрсетілді. 150 мүгедек жанға азық-түлік пакеттері түрінде көмек беріп, 5 адамның оңалту-емделуі үшін жағдай жасалды. Балаларды оңалту орталығының материалдық-техникалық базасын жақсарту үшін демеушілік көрсетті.
«Жылдың үздік қамқоршысы» аталған жеңімпаздың бірі – Ақмола облысының «Балбөбек 2014» ЖШС басшысы Жанар Науханқызы Хасенова. Ол кешенді қайырымдылық қызметі мен елеулі әлеуметтік-маңызды өзгерістер жасағаны үшін жеңімпаз атанған. Көпбалалы отбасылардан шыққан 10 баланы балабақшаға тегін баруға демеушілік көмек көрсеткен, аз қамтылған, көпбалалы отбасыларға және мүмкіндігі шектеулі адамдарға қаржылық қолдау жасаған «балбөбектіктер» түрлі мерекелік іс-шараларды өтеусіз ұйымдастыруға ұйытқы болып келеді.
Жалпы, қоғамда мұндай мысалдар көптеп саналады. Барлық лауреатқа естелік сыйлықтар мен дипломдар табыс етілді.
